Sangli Statue : 'आम्ही पुतळा परत नेणार नाही', शिवप्रेमी आक्रमक; पोलीस आणि समितीत वाद

सांगली शहरात छत्रपती शिवाजी महाराज पुतळा समिती, आष्टा यांनी लोकवर्गणीतून तयार केलेला छत्रपती शिवाजी महाराजांचा पुतळा पोलिसांनी अडवल्याने मोठा तणाव निर्माण झाला. 'आचारसंहितेला याचा मुळात काहीही संबंध नाही, पुतळं न्यायला कुठली आचारसंहिता?', असा थेट सवाल पुतळा समितीने प्रशासनाला केला आहे. वाहतुकीस परवानगी नसल्याचे कारण देत पोलिसांनी पुतळा अडवला, तर रीतसर पत्रव्यवहार करूनच पुतळा आष्टा येथील एका खाजगी संस्थेच्या जागेत नेत असल्याचे समितीने स्पष्ट केले. काही काळानंतर हा पुतळा उभारला जाणार होता, असेही समितीने सांगितले. अखेरीस, पोलिसांनी हा पुतळा संरक्षणात सुरक्षित ठिकाणी नेला. यानंतर, पुतळा समितीच्या कार्यकर्त्यांनी सांगली शहर पोलीस ठाण्यात गर्दी करत पुतळा नेण्यासाठी आवश्यक बाबींची पूर्तता करण्याची मागणी केली. रात्री उशिरापर्यंत प्रशासन आणि समितीमध्ये तोडगा काढण्याचे प्रयत्न सुरू होते.