Pawar Politics: पुण्यात बैठकीच्या निमित्ताने शरद पवार आणि अजित पवार एकत्र

पुण्यातील वसंतदादा शुगर इन्स्टिट्यूट (VSI) येथे झालेल्या एका महत्त्वाच्या बैठकीमुळे राजकीय वर्तुळात पुन्हा एकदा चर्चांना उधाण आले आहे. या बैठकीला राष्ट्रवादी काँग्रेसचे अध्यक्ष शरद पवार (Sharad Pawar) आणि राज्याचे उपमुख्यमंत्री अजित पवार (Ajit Pawar) हे दोघेही उपस्थित होते. 'बैठकीच्या निमित्ताने काका पुतण्या एकत्र आले मात्र त्यांच्यामध्ये कोणतीही राजकीय चर्चा झाली नसल्याची माहिती आहे'. या बैठकीत प्रामुख्याने पूरपरिस्थितीमुळे पिकांचे झालेल्या नुकसानीचा आढावा घेण्यात आला. माजी मंत्री बाळासाहेब थोरात (Balasaheb Thorat) आणि राजेश टोपे (Rajesh Tope) यांचीही या बैठकीला उपस्थिती होती. राजकीय मतभेद बाजूला ठेवून शेतकरी आणि ऊस उद्योगाच्या प्रश्नावर पवार काका-पुतणे एकत्र आल्याने अनेकांच्या भुवया उंचावल्या आहेत. या भेटीनंतर राजकीय तडजोडीच्या चर्चांना पुन्हा एकदा बळ मिळाले आहे.