Pune Land Scam: पुण्यात एक लाख कोटींचा जमीन घोटाळा? काँग्रेस आक्रमक

पुण्यातील कथित जमीन घोटाळ्यावरून (Pune Land Scam) राजकारण तापले आहे. काँग्रेस नेते नाना पटोले (Nana Patole) यांनी सत्ताधाऱ्यांवर गंभीर आरोप करत, उपमुख्यमंत्री अजित पवार यांचे पुत्र पार्थ पवार (Parth Pawar) यांच्यावर निशाणा साधला आहे. 'पुण्यातल्या जमिनीची माहिती घेतली तर किमान एक लाख कोटी रुपयांचा घोटाळा समोर आल्याशिवाय राहणार नाही,' असा दावा पटोले यांनी केला आहे. ही जमीन महार वतनाची (Mahar Vatan Land) असून, तिची मूळ किंमत १८०० कोटी रुपये असताना बेकायदेशीरपणे व्यवहार झाल्याचा आरोप आहे. या प्रकरणी स्पेशल इन्वेस्टिगेशन टीम (SIT) स्थापन करून काही साध्य होणार नाही, असे म्हणत पटोले यांनी थेट कारवाईची मागणी केली आहे. या घोटाळेबाजांवर गुन्हे दाखल करून मूळ मालकांना, म्हणजेच महार वतन समाजाला, जमीन परत करावी, अशी मागणी काँग्रेसने केली आहे. लवकरच पुण्यात जाऊन याप्रकरणी आंदोलनाची पुढील दिशा ठरवणार असल्याचेही त्यांनी स्पष्ट केले.