Chidambaram on Blue Star: 'ऑपरेशन ब्ल्यू स्टार ही मोठी चूक होती', पी चिदंबरम यांचं मोठं वक्तव्य

काँग्रेसचे ज्येष्ठ नेते आणि माजी गृहमंत्री पी. चिदंबरम यांनी ऑपरेशन ब्ल्यू स्टारबाबत केलेल्या विधानामुळे राजकीय वर्तुळात खळबळ उडाली आहे. 'ऑपरेशन ब्ल्यू स्टार ही मोठी चूक होती आणि तत्कालीन पंतप्रधान इंदिरा गांधींना आपल्या जीवाची मोठी किंमतही चुकवावी लागली,' असं वक्तव्य पी. चिदंबरम यांनी केलं आहे. हिमाचल प्रदेशातील कसौली येथे खुशवंत सिंह साहित्य महोत्सवात ते बोलत होते. पत्रकार हरिंदर बावेजा यांच्या 'दे विल शूट यू मॅडम' या पुस्तकावरील परिसंवादात त्यांनी हे मत मांडले. अमृतसरच्या सुवर्ण मंदिरातून दहशतवाद्यांना बाहेर काढण्यासाठी लष्करी कारवाई करणे चुकीचे होते, असेही ते म्हणाले. मात्र, या ऑपरेशनसाठी केवळ इंदिरा गांधींना दोष देणे चुकीचे ठरेल, कारण हा लष्कर, पोलीस आणि गुप्तचर यंत्रणांचा एकत्रित निर्णय होता, असेही त्यांनी स्पष्ट केले.