MPSC Exam Postponed | अतिवृष्टी आणि पूरस्थितीमुळे MPSC परीक्षा पुढे ढकलली, नवी तारीख जाहीर

राज्यामध्ये मराठवाडा आणि पश्चिम महाराष्ट्र या भागांमध्ये झालेल्या अतिवृष्टीमुळे काही ठिकाणी पूरस्थिती निर्माण झाली आहे. या परिस्थितीमुळे महाराष्ट्र लोकसेवा आयोगाने (MPSC) एक महत्त्वाचा निर्णय घेतला आहे. आयोगाने २८ सप्टेंबर रोजी होणारी महाराष्ट्र नागरी सेवा राजपत्रित संयुक्त पूर्व परीक्षा पुढे ढकलली आहे. ही परीक्षा आता २८ सप्टेंबरऐवजी ९ नोव्हेंबर रोजी घेतली जाईल. मराठवाडा आणि पश्चिम महाराष्ट्रातील अनेक जिल्ह्यांमध्ये झालेल्या मुसळधार पावसामुळे जनजीवन विस्कळीत झाले आहे. विद्यार्थ्यांना परीक्षा केंद्रांवर पोहोचण्यात येणाऱ्या अडचणी आणि एकूणच परिस्थिती लक्षात घेऊन आयोगाने हा निर्णय घेतला आहे. या निर्णयामुळे हजारो विद्यार्थ्यांना दिलासा मिळाला आहे. महाराष्ट्र लोकसेवा आयोगाने अधिकृतपणे ही माहिती जाहीर केली आहे.