Devendra Fadnavis Floods | मुख्यमंत्री देवेंद्र फडणवीसांकडून पाहणी, नुकसानग्रस्तांशी संवाद

मुख्यमंत्री देवेंद्र फडणवीस यांनी सोलापूर जिल्ह्यातील माढा तालुक्यातील निमगाव येथे पूरपरिस्थितीची पाहणी केली. त्यांच्यासोबत दोन्ही उपमुख्यमंत्रीही शेतकऱ्यांच्या बांधावर जाऊन त्यांच्या व्यथा जाणून घेत आहेत. सरकारने पूरग्रस्तांना सर्वतोपरी मदत करण्याचे आश्वासन दिले आहे. सोलापूरमध्ये शेतकऱ्यांचे आणि सर्वसामान्यांचे मोठे नुकसान झाले आहे. मुख्यमंत्री देवेंद्र फडणवीस यांनी सांगितले की, ज्यांचे जेवढे नुकसान झाले तेवढी नुकसान भरपाई त्यांना सरकारच्या वतीने दिली जाईल. कृषिमंत्री दत्तात्रय भरणे यांनी दिवाळीपूर्वी शेतकऱ्यांना नुकसान भरपाई दिली जाईल असे सांगितले आहे. निमगाव गावात ५० ते ६० घरांमध्ये पाणी शिरले असून शेकडो हेक्टर शेतजमीन खरडून गेली आहे. सीना नदीला आलेल्या महापुरामुळे पापनस, रिधोरे, निमगाव, दारफळ, केवड, उंदरगाव या गावांना धोका निर्माण झाला होता. केवड आणि उंदरगाव येथील लोकांना जवळच्या आश्रम शाळेत स्थलांतरित करण्यात आले आहे. मुख्यमंत्री देवेंद्र फडणवीस निमगाव आणि दारफळ येथील पाहणीनंतर लातूर जिल्ह्यालाही भेट देणार आहेत. मराठवाड्यात अभूतपूर्व पाऊस झाल्याने मोठे नुकसान झाले आहे.