Lalbaugcha Raja Visarjan : समुद्राला भरती, लालबागच्या राजाच्या विसर्जनात मोठा अडथळा

लालबागच्या राजाच्या विसर्जनाला उशीर झाला आहे. समुद्रामध्ये मोठी भरती आल्यामुळे विसर्जन रखडले आहे. "भरती असल्यामुळे लालबागच्या राजाच्या विसर्जनामध्ये ही अडचण निर्माण झालेली आहे," असे सांगण्यात आले. ओहोटीनंतर मूर्ती तराफ्यावर ठेवण्याचा प्रयत्न केला जाईल. लालबागच्या राजाची मिरवणूक काल साधारण बाराच्या सुमारास सुरू झाली होती. आज सकाळी साडेसातच्या सुमारास लालबागचा राजा गिरगाव चौपाटीवर दाखल झाला. त्यावेळी भरतीची वेळ सुरू झाली होती आणि पाणी चढायला लागले होते. त्यामुळे बाप्पाची मूर्ती तराफ्यावर व्यवस्थित येऊ शकली नाही. यंदा स्वयंशलित असा अत्याधुनिक तराफा वापरण्यात येत आहे. मात्र, या तराफ्यावर मूर्ती चढवण्यात अडचणी येत आहेत. हायड्रोलिक्स संदर्भातही अडचण आल्याचे बोलले जात आहे, परंतु याला अद्याप अधिकृत दुजोरा मिळालेला नाही. ओहोटी साधारणपणे तीन ते चार तासानंतर येईल आणि त्यानंतर लालबागच्या राजाचे विसर्जन पार पडेल. गिरगाव चौपाटीवर अजूनही गर्दी कमी झालेली नाही. कोळी बांधवांच्या बोटी देखील समुद्रात उतरल्या आहेत आणि त्यांच्याकडून तराफ्यावर मूर्ती ठेवण्यासाठी प्रयत्न केले जात आहेत.