Govind Pansare Case: कॉम्रेड गोविंद पानसरे हत्या प्रकरण, संशयित आरोपींना जामीन मंजूर

कॉम्रेड गोविंद पानसरे (Comrade Govind Pansare) हत्या प्रकरणात मोठी घडामोड समोर आली आहे. या खटल्यातील प्रमुख संशयित आरोपी डॉ. वीरेंद्रसिंह तावडे (Dr. Virendrasing Tawde), अमोल काळे (Amol Kale) आणि शरद कळसकर (Sharad Kalaskar) यांना मुंबई उच्च न्यायालयाच्या कोल्हापूर खंडपीठाने जामीन मंजूर केला आहे. वकिलांच्या माहितीनुसार, 'पानसरे खून खटल्यातील तीन जणांचा जामीन आज कोल्हापूरच्या सर्किट बेंच हायकोर्टाने मंजूर केला आहे.' या निर्णयामुळे, या प्रकरणात अटक करण्यात आलेले सर्व १२ संशयित आरोपी आता जामिनावर बाहेर आले आहेत. डॉ. तावडे, काळे आणि कळसकर हे जामीन न मिळाल्याने कळंबा कारागृहात होते. आज झालेल्या सुनावणीत मुंबई उच्च न्यायालयाच्या कोल्हापूर खंडपीठाने तिघांनाही जामीन दिला, ज्यामुळे पानसरे हत्या प्रकरणातील सर्व आरोपी आता तुरुंगाबाहेर आहेत.