Early Arrival: दिवाळीत 'Hapus' आंब्याची एन्ट्री, Devgad च्या शेतकऱ्याची कमाल, पहिली पेटी APMC मध्ये

यंदाच्या हापूस आंब्याच्या हंगामाला दिवाळीच्या मुहूर्तावर सुरुवात झाली आहे. देवगडमधील आंबा बागायतदार प्रकाश दोंडू शिर्सेकर यांनी या मोसमातील पहिली हापूस आंब्याची पेटी नवी मुंबईच्या एपीएमसी मार्केटमध्ये पाठवली आहे. प्रकाश शिर्सेकर यांनी दिवाळीच्या मुहूर्तावर सहा डझन हापूस आंब्याची पेटी पाठवून या वर्षीच्या विक्रीचा शुभारंभ केला. फळव्यापारी हर्षल जेजूरकर यांच्याकडे ही पेटी दाखल झाली असून, लक्ष्मीपूजनाच्या दिवशी या आंब्यांचे पूजन करण्यात आले. शिर्सेकर यांच्या बागेतील काही कलमांना जुलै महिन्यातच मोहोर आला होता, ज्याचे त्यांनी प्लास्टिकचे आवरण घालून संरक्षण केले. याच यशस्वी प्रयोगामुळे हंगामाच्या खूप आधीच हापूस आंबा बाजारात दाखल झाला आहे. साधारणपणे जानेवारीत येणारा आंबा नोव्हेंबरमध्ये आल्याने शेतकरी आणि व्यापाऱ्यांमध्ये आनंदाचे वातावरण आहे.