जायकवाडी धरणाचा पाणीसाठा 53 टक्क्यांवर, संभाजीनगर-जालन्याच्या 300 खेड्यांचा पाणी प्रश्न सुटला

मराठवाड्यातील छत्रपती संभाजीनगर, जालना आणि इतर तीनशे खेड्यांचा पिण्याच्या पाण्याचा प्रश्न मिटला आहे. जायकवाडी धरणातील पाणीसाठा त्रेपन्न टक्क्यांवर पोहोचल्यामुळे ही दिलासादायक स्थिती निर्माण झाली आहे. सध्या जायकवाडी धरणात सोळा हजार दोनशे पंचाण्णव क्युसेक वेगाने पाण्याची आवक सुरू आहे. यामुळे धरणात मुबलक पाणीसाठा उपलब्ध झाला आहे. यावर्षीदेखील जायकवाडी धरण पूर्ण क्षमतेने भरण्याची शक्यता वर्तवण्यात आली आहे. जायकवाडी धरणात विविध धरणांमधून पाणी येते. यामध्ये दारणा धरणातून सहा हजार सहाशे बेचाळीस क्युसेक, गंगापूर धरणातून तीन हजार सातशे सोळा क्युसेक, नांदूर मधमेश्वरमधून पंधरा हजार सातशे पंचाहत्तर क्युसेक, पालखेड धरणातून एक हजार तीनशे छप्पन्न क्युसेक आणि भावली धरणातून सातशे एक क्युसेक वेगाने पाण्याचा विसर्ग सुरू आहे. गेल्या सहा वर्षांतील जायकवाडी धरणातील पाणीसाठ्याची आकडेवारी पाहता, दोन हजार वीस मध्ये अडतीस पूर्णांक सत्तावन्न टक्के, दोन हजार एकवीस मध्ये तेहेत्तीस पूर्णांक नव्वद टक्के, दोन हजार बावीस मध्ये तेहेत्तीस पूर्णांक चौऱ्याण्णव टक्के, दोन हजार तेवीस मध्ये पंचवीस पूर्णांक छप्पन्न टक्के आणि दोन हजार चोवीस मध्ये चार पूर्णांक चोपन्न टक्के पाणीसाठा होता. या तुलनेत दोन हजार पंचवीस मध्ये त्रेपन्न टक्के इतका पाणीसाठा झाल्याने मराठवाड्याचा पाणीप्रश्न सध्यातरी मिटल्याचे स्पष्ट झाले आहे.