DelhiBlast: 'दहशतवादी हल्ल्याचा कट'; फरीदाबादमध्ये स्फोटकं जप्त, संध्याकाळी लाल किल्ल्याजवळ स्फोटात ८ ठार

दिल्लीतील लाल किल्ला परिसरात सोमवारी संध्याकाळी झालेल्या भीषण बॉम्बस्फोटाने संपूर्ण देश हादरला आहे. या स्फोटात आतापर्यंत ८ जणांचा मृत्यू झाला असून अनेक जण जखमी झाले आहेत. एका प्रत्यक्षदर्शीने स्फोटाची भीषणता सांगताना 'काही मृतदेहांचे तुकडे गाडीत ठेवले आहेत, तर काही इतरत्र पडलेले आहेत,' असे सांगितले. या घटनेनंतर दिल्लीसह मुंबई आणि उत्तर प्रदेशात हाय अलर्ट जारी करण्यात आला आहे. हा स्फोट सामान्य नसल्याचा संशय असून, घटनास्थळी दिल्ली पोलिसांसह जम्मू-काश्मीर पोलीस, इंटेलिजन्स ब्युरो (IB) आणि राष्ट्रीय तपास यंत्रणेचे (NIA) अधिकारी दाखल झाले आहेत व तपास सुरू केला आहे. विशेष म्हणजे, याच दिवशी फरीदाबादमध्ये जम्मू-काश्मीर पोलिसांनी एका डॉक्टरला अटक करून मोठ्या प्रमाणात स्फोटकं जप्त केली होती. त्यामुळे या दोन्ही घटनांचा एकमेकांशी संबंध असल्याचा संशय सुरक्षा यंत्रणांकडून व्यक्त केला जात आहे.