Devendra Fadnavis on Thackeray : विजय मेळावा की रुदाली? फडणवीसांचा ठाकरेंना जोरदार टोला!

देवेंद्र फडणवीसांनी दोन्ही ठाकरे बंधूंना जोरदार प्रत्युत्तर दिले आहे. विजयी मेळाव्याच्या नावाखाली रुदालीचे भाषण झाले, असे म्हणत फडणवीसांनी उद्धव ठाकरेंचा समाचार घेतला. "मला असं सांगण्यात आलं होतं की विजयी मेळावा होणार आहे, पण त्या ठिकाणी रुदालीचे भाषण देखील झालं आणि मराठींबद्दल एक शब्द न बोलता आमचं सरकार गेलं, आमचं सरकार पडलं, आम्हाला सरकारमधे द्या, आम्हालाच निवडून द्या," असे फडणवीस म्हणाले. त्यांनी स्पष्ट केले की, "हा मराठीचा विजय उत्सव नव्हता, ही रुदाली होती." या रुदालीचे दर्शन त्या ठिकाणी घेतल्याचे त्यांनी नमूद केले. राज ठाकरेंनी दोन बंधूंना एकत्रित आणण्याचे श्रेय आपल्याला दिल्याबद्दल फडणवीसांनी त्यांचे आभार मानले. तसेच, श्रद्धेय बाळासाहेबांचे आशीर्वाद आपल्यालाच मिळत असल्याचे मिष्कील टिप्पणी देखील त्यांनी केली. उद्धव ठाकरेंच्या भाषणात मराठीचा उल्लेख नसून केवळ सत्ता गमावल्याची खंत आणि पुन्हा सत्तेत येण्याची मागणी होती, असे फडणवीसांनी म्हटले.