Ashadhi Ekadashi | मानाच्या वारकऱ्यांसोबत CM नी केली महापूजा, Pandharpur Corridor वरही बोलले

नाशिक जिल्ह्यातील जातेगावचे कैलास उगले आणि कल्पना उगले हे यंदाचे मानाचे वारकरी दाम्पत्य ठरले. त्यांना मुख्यमंत्री आणि त्यांच्या पत्नीसोबत विठ्ठलाच्या महापूजेचा मान मिळाला. उगले दाम्पत्याचा शाल आणि विठ्ठल रुक्मिणी मातेची मूर्ती देऊन सन्मान करण्यात आला. त्यांना एका वर्षाचा एसटीचा मोफत प्रवासाचा पासही देण्यात आला. विठ्ठल मंदिर समितीने मुख्यमंत्र्यांचा आणि त्यांच्या पत्नीचा शाल घालून सन्मान केला. मंदिर समितीच्या गहिनीनाथ महाराजांनी आषाढीसाठी वारकऱ्यांना उपलब्ध करून दिलेल्या सोयी सुविधांबद्दल मुख्यमंत्र्यांचे आभार मानले. त्यांनी पंढरपूर येथे संतपीठाची स्थापना करण्याची विनंती केली. शासकीय पूजेनंतर मुख्यमंत्र्यांनी बळीराजाला चांगले पीक व्हावे आणि त्यांच्या जीवनात आनंद यावा अशी प्रार्थना केली. पंढरपूर कॉरिडॉरच्या संदर्भात बोलताना, "कोणाचंही नुकसान आम्ही होऊ देणार नाही. तो दुकानदार असो, तो घरमालक असो, तो सामान्य माणूस असो, कोणाचंही नुकसान न करता सकळ्यांचं योग्य पुनर्वसन करून या ठिकाणी हा कॉरिडॉर आपण तयार करणार आहोत," असे मुख्यमंत्र्यांनी सांगितले. मंदिराच्या कारभारासाठी कायदा करणे म्हणजे सरकारीकरण नाही, तर व्यवस्थापन चांगले चालावे यासाठी हा प्रयत्न असल्याचे त्यांनी स्पष्ट केले. उगले दाम्पत्याने महापूजेचा मान मिळाल्याने खूप आनंद झाल्याचे सांगितले. त्यांना स्वप्नातही असे घडेल असे वाटले नव्हते. ते पंधरा वर्षांपासून पायी वारी करत आहेत आणि शेतीचा व्यवसाय करतात.