Vaibhav Sooryavanshi: श्रीलंकेतही 'सूर्यवंशी' वादळ घोंगावलं; वैभवच्या धडाकेबाज खेळीत दिसली किंग कोहलीची झलक, चक्क षटकारांचा नाद सोडत इतक्या चौकारांचा वर्षाव केला की..
वैभव सूर्यवंशीच्या खेळीने अनेक क्रिकेट चाहत्यांना विराट कोहलीच्या सुरुवातीच्या दिवसांची आठवण करून दिली, जेव्हा चौकारांच्या जोरावर धावगती कायम ठेवणे ही त्याची सर्वात मोठी ताकद होती.
Vaibhav Sooryavanshi: श्रीलंकेतील दांबुला येथील रंगिरी दांबुला आंतरराष्ट्रीय स्टेडियमवर खेळल्या जात असलेल्या 2026 च्या त्रिकोणीय 'अ' मालिका सामन्यादरम्यान, भारत 'अ' संघाचा युवा फलंदाज वैभव सूर्यवंशीने आपल्या आक्रमक फलंदाजीने पुन्हा एकदा लक्ष वेधून घेतले. आज (11 जून) अफगाणिस्तान 'अ' संघाविरुद्ध डावाची सुरुवात करताना, वैभवने अवघ्या 22 चेंडूंमध्ये 44 धावांची वेगवान खेळी केली. षटकारांसाठी ओळखला जाणारा वैभव आज वेगळ्याच मूडमध्ये होता. त्याने आपल्या संपूर्ण खेळीत एकही षटकार मारला नाही, पण त्याने इतक्या जोरदार चौकारांचा वर्षाव केला की अफगाणिस्तान 'अ' संघाच्या गोलंदाजांवर दबाव आला. त्याच्या खेळीत एकूण नऊ चौकार आणि 200 चा स्ट्राईक रेट होता.
वैभव सूर्यवंशी आणि प्रभसिमरन सिंग यांनी भारत 'अ' संघासाठी डावाची सुरुवात केली. अफगाणिस्तान 'अ' संघाने नाणेफेक जिंकून प्रथम गोलंदाजी करण्याचा निर्णय घेतला, पण वैभवने सुरुवातीपासूनच आक्रमक पवित्रा घेतला. त्याने नव्या चेंडूचा फायदा घेत मैदानाच्या सर्व बाजूंनी आकर्षक फटके मारले आणि संघाला वेगवान सुरुवात करून दिली. मात्र, शानदार अर्धशतकाच्या दिशेने वाटचाल करणारा वैभव सातव्या षटकात बाद झाला. डावाच्या 7.1 व्या षटकात, त्याने अब्दुल्ला अहमदझाईच्या एका आखूड चेंडूला बॅकफूटवर खेळवण्याचा प्रयत्न केला, पण चेंडू बॅटची कड घेऊन यष्टीरक्षक इशाक रहिमीच्या हातमोज्यांमध्ये विसावला.
22 चेंडूंमध्ये 44 धावा करून वैभव परतला
अशाप्रकारे, 22 चेंडूंमध्ये 44 धावा करून वैभव पॅव्हेलियनमध्ये परतला. मात्र, त्याच्या बाद होण्याच्या पद्धतीवरही प्रश्नचिन्ह निर्माण झाले. बाद झाल्यानंतर त्याच्या चेहऱ्यावरची निराशा स्पष्टपणे दिसत होती, कारण तो सहजपणे आपले अर्धशतक पूर्ण करू शकला असता. तरीही, त्याच्या खेळीने हे दाखवून दिले की तो केवळ मोठ्या फटक्यांवरच नव्हे, तर उत्कृष्ट स्ट्रोकप्ले आणि टायमिंगचा वापर करूनही वेगाने धावा करू शकतो.
यामुळेच त्याच्या खेळीने अनेक क्रिकेट चाहत्यांना विराट कोहलीच्या सुरुवातीच्या दिवसांची आठवण करून दिली, जेव्हा चौकारांच्या जोरावर धावगती कायम ठेवणे ही त्याची सर्वात मोठी ताकद होती. विशेष म्हणजे, विराट कोहलीसुद्धा षटकार मारण्यापेक्षा डाव उभारण्यावर अधिक विश्वास ठेवतो आणि वैभव त्याच शैलीत खेळला. यापूर्वी, मंगळवारी श्रीलंका 'अ' संघाविरुद्धच्या सामन्यात वैभव सूर्यवंशीने तीन चौकारांसह 12 चेंडूंमध्ये 14 धावा केल्या होत्या. आयपीएल 2026 मध्ये 72 षटकार मारणाऱ्या वैभव सूर्यवंशीने आतापर्यंत प्रामुख्याने चौकारांवरच लक्ष केंद्रित केले आहे.
इतर महत्वाच्या बातम्या
महत्त्वाच्या बातम्या
