Mithali Raj : मितालीनं रचला इतिहास, 'हा' विक्रम करणारी जगातली पहिली महिला क्रिकेटर

Mithali Raj : भारतीय महिला एकदिवसीय क्रिकेट संघाची कर्णधार मिताली राजनं इतिहास रचला आहे. क्रिकेटच्या सर्व प्रकारांमध्ये मिळून 20 हजार धावांचा पल्ला गाठला आहे.

Mithali_Raj_02

Mithali Raj : भारतीय महिला एकदिवसीय क्रिकेट संघाची कर्णधार मिताली राजनं इतिहास रचला आहे.  ऑस्ट्रेलिया विरुद्ध सुरु असलेल्या मालिकेतील पहिल्या सामन्यात मितालीनं 61 धावांची खेळी केली. या खेळी दरम्यान तिनं एक नवा विक्रम केला आहे. मितालीनं क्रिकेटच्या सर्व प्रकारांमध्ये मिळून 20 हजार धावांचा पल्ला गाठला आहे. हा विक्रम करणारी ती जगातील एकमेव महिला क्रिकेटर आहे.  

मिताली राजनं 217 एकदिवसीय सामन्यांमध्ये 7304 धावा केल्या आहेत. तर 11 कसोटी सामन्यांमध्ये 669 धावा केल्या आहेत. कसोटीत तिची सर्वाधिक धावसंख्या 214 आहे. याशिवाय 89 टी -20 आंतरराष्ट्रीय सामन्यांमध्ये मितालीने 2364 धावा केल्या आहेत.टी-20 फॉरमॅटमध्ये मितालीने 17 अर्धशतके झळकावली आहेत. स्थानिक क्रिकेटमध्ये देखील मितालीनं धावांचा पाऊस पाडला आहे. या सर्व प्रकारांमध्ये तिनं वीस हजार धावा पूर्ण केल्या आहेत. तिच्या या विक्रमाबद्दल बीसीसीआयनं तिचं अभिनंदन केलं आहे.  

मितालीची धमाकेदार खेळी सुरुच
मिताली राज सध्या महिला क्रिकेटरच्या आयसीसी रॅंकिंगमध्ये नंबर वनवर आहे.  मिताली राजने 1999 मध्ये भारतासाठी खेळायला सुरुवात केली. तिनं मागील 22 वर्षांमध्ये भारतासाठी जबरदस्त खेळाचं प्रदर्शन केलं आहे.  

सर्वात जास्त काळ एकदिवसीय क्रिकेट कारकीर्द असलेली दुसरी आंतरराष्ट्रीय क्रिकेटर
भारतीय महिला किक्रेट संघाची माजी कर्णधार मिताली राज सर्वात जास्त काळ एकदिवसीय क्रिकेट कारकीर्द असलेली दुसरी आंतरराष्ट्रीय क्रिकेटर ठरली आहे. याबाबतीत मितालीने श्रीलंकेचा माजी दिग्गज खेळाडू सनथ जयसूर्याला मागे टाकलं आहे. या यादीमध्ये भारताचा मास्टर ब्लास्टर सचिन तेंडुलकर अव्वल स्थानी आहे. 

सचिन तेंडुलकरने डिसेंबर 1989 मध्ये क्रिकेट कारकिर्दीची सुरुवात केली होती. सचिनची एकदिवसीय क्रिकेट कारकीर्द 22 वर्ष आणि 91 दिवस होती. तर मिताली राजने जून 1999 मध्ये एकदिवसीय क्रिकेटमध्ये पदार्पण केले. मिताली राजने 26 जून 1999 रोजी आयर्लंडविरुद्ध आंतरराष्ट्रीय एकदिवसीय सामन्यात पदार्पण केलं होतं. मितालीची एकदिवसीय कारकीर्द सध्या 22 वर्षांची झाली आहे. सनथ जयसूर्याला मागे टाकत ती सर्वाधिक काळ एकदिवसीय क्रिकेट खेळणारी जगातील दुसरी क्रिकेटपटू ठरली आहे. सनथ जयसूर्याची एकदिवसीय कारकीर्द 21 वर्ष 184 दिवस एवढी होती.