आयपीएल विजेत्या-उपविजेत्यांवर पैशांचा पाऊस, कुणाला किती बक्षीस मिळणार?
IPL 2022 Prize Money : आयपीएलच्या 15व्या मोसमाची मेगा फायनल रविवारी अहमदाबादच्या नरेंद्र मोदी स्टेडियमवर खेळवली जाणार आहे.
IPL 2022 Prize Money : आयपीएलच्या 15व्या मोसमाची मेगा फायनल रविवारी अहमदाबादच्या नरेंद्र मोदी स्टेडियमवर खेळवली जाणार आहे. समारोपाच्या खास कार्यक्रमानंतर रात्री आठ वाजता सामन्याला सुरुवात होईल. यंदाच्या मोसमात नव्यानं दाखल झालेला गुजरात टायटन्स आणि 14 वर्षांनी फायनलमध्ये पोहोचलेली राजस्थान रॉयल्स यांच्यात फायनलचा हा थरार पाहायला मिळणार आहे. पण त्याआधीच क्रीडा चाहत्यांमध्ये बक्षिसांची चर्चा सुरु झाली आहे. रिपोर्ट्सनुसार, आयपीएल विजेत्या संघाला गतवर्षी इतकी रक्कम देण्यात येणार आहे. त्याशिवाय ऑरेंज कॅप, पर्पल कॅप, इमर्जिंग प्लेयर, ड्रीम 11 गेम चेंजर, पॉवर प्लेयर, मोस्ट व्हॅल्यूएबलसह इतर अनेक व्यक्तिगत पुरस्कार जिंकणारे खेळाडूही मालामाल होणार आहेत. (How Much money will IPL 2022 Winner get)
रिपोर्ट्सनुसार, आयपीएल 2022 चा चषक उंचावणाऱ्या संघाला 20 कोटी रुपयांचे बक्षीस देण्यात येणार आहे. तर उपविजेत्या संघाला 13 कोटी रुपये देण्यात येणार आहे. तिसऱ्या क्रमांकावरील संघाला (क्वालिफायर 2 मध्ये पराभूत झालेला संघ) सात कोटी रुपयांची रक्कम बक्षीस म्हणून देण्यात येणार आहे. तर चौथ्या क्रमांकावरील संघाला 6.5 कोटी रुपयांचे बक्षीस देण्यात येणार आहे. केएल राहुलच्या नेतृत्वातील लखनौ संघाचे 6.5 कोटी रुपयांचे बक्षिस निश्चित झालेय. कारण, एलिमेनटर सामन्यात त्यांचा पराभव झालाय.
फायनलमध्ये कुणाचं पारडं जड?
गुजरातचा संघ पदार्पणातच यंदाच्या मोसमातला सर्वात यशस्वी संघ ठरला. हार्दिक पंड्याचं नेतृत्व, डेव्हिड मिलरचा अनुभव, रशिद खानची जादूई फिरकी यासह संघातल्या प्रत्येक खेळाडूचं मोलाचं योगदान गुजरात टायटन्सला आयपीएलच्या फायनलमध्ये घेऊन गेलंय. गुजरातचा संघ आयपीएलच्या रणांगणात नवखा असला, तरी तो पदार्पणात सर्वात यशस्वी संघ ठरलाय. हार्दिक पंड्याच्या या फौजेनं साखळीत १४ पैकी १० सामने जिंकले. आणि मग क्वालिफायरची पायरी एकाच फटक्यात पार करुन सहजपणे फायनल गाठली. त्यामुळे फायनलमध्ये गुजरातचं पारडं जड मानलं जातंय. इकडे संजू सॅमनसनच्या राजस्थानला अंतिम फेरीत पोहोचण्यासाठी मोठा वळसा घालावा लागलाय. क्वालिफायरच्या पहिल्या सामन्यात त्यांचा गुजरातकडून पराभव झाला.पण राजस्थानची 'रॉयल' ब्रिगेड दुसऱ्या क्वालिफायरमध्ये नेटानं लढली. आणि बंगलोरला हरवून राजस्थाननं आपला 14 वर्षांचा वनवास संपवला. तुम्हाला आठवत असेल की 2008 सालच्या पहिल्यावहिल्या आयपीएलमध्ये राजस्थान रॉयल्स हाच संघ विजेता ठरला होता. पण त्यानंतर राजस्थानला एकदाही विजेतेपद सोडा पण अंतिम फेरी गाठता आली नव्हती. त्यामुळं यंदा तब्बल १४ वर्षांनी राजस्थान फायनमध्ये खेळताना दिसणार आहे.
आयपीएल 2022 नंतर कुणाला किती रक्कम मिळणार
| Award | Prize Money (in rupees) |
| पर्पल कॅप विजेता | 15 लाख |
| ऑरेंज कॅप विजेता | 15 लाख |
| सुपर स्ट्राईकर | 15 लाख |
| Crack it sixes of the season | 12 लाख |
| पॉवर प्लेयर | 12 लाख |
| मोस्ट व्हॅल्यूएबल प्लेअर | 12 लाख |
| गेम चेंजर | 12 लाख |
| इमर्जिंग प्लेयर | 20 लाख |
| परफेक्ट कॅच ऑफ द सीजन | 12 लाख |
| सामनावीर (फायनल) | 5 लाख |
2008 पासून विजेत्या संघाला किती रक्कम दिली गेली?
IPL 2008 – 4.8 crore
IPL 2009 – 6 crore
IPL 2010 – 8 crore
IPL 2011 – 10 crore
IPL 2012 – 10 crore
IPL 2013 – 10 crore
IPL 2014 – 15 crore
IPL 2015 – 15 crore
IPL 2016 – 20 crore
IPL 2017 – 15 crore
IPL 2018 – 20 crore
IPL 2019 – 20 crore
IPL 2020 – 10 crore
IPL 2021 – 20 crore
महत्त्वाच्या बातम्या
