CSK vs LSG : आयुष बडोनीचे दमदार अर्धशतक, सामन्यात पावसाचा व्यत्यय; चेन्नईला विजयासाठी 127 धावांचे आव्हान
CSK vs LSG, IPL 2023 : लखनौ आणि चेन्नई यांच्यातील सामन्यादरम्यान पावसाचा व्यत्यय आलाय.
CSK vs LSG, IPL 2023 : लखनौ आणि चेन्नई यांच्यातील सामन्यादरम्यान पावसाचा व्यत्यय आलाय. पावसामुळे सामन्याला जवळपसा तासभर विलंब झाला आहे. पावसामुळे चेन्नईला 19 षटकात 127 धावांचे आव्हान देण्यात आले आहे. आयुष बडोनीच्या अर्धशतकाच्या बळावर लखनौने 19.2 षटकात सात बाद 125 धावा केल्या होत्या. आयुष बडोनी याने 33 चेंडूत नाबाद 59 धावांची खेळी केली.
पावसाच्या व्यत्यानंतर सामना सुरु झाल्यास डकवर्थ लुईस नियमांनुसार चेन्नईला आव्हान दिले जाईल. 19 षटकांचा सामना झाल्यास चेन्नईला विजयासाठी 127 धावांचे आव्हान असेल. तर 18 षटकांचा सामना झाल्यास चेन्नईला 122 धावांचे आव्हान असेल. 10 षटकांचा सामना झाल्यास चेन्नईला 76 धावा कराव्या लागतील. पाच षटकांचा सामना झाल्यास चेन्नईला विजयासाठी 42 धावांचे आव्हान असेल.
चेन्नईने नाणेफेक जिंकून प्रथम गोलंदाजी करण्याचा निर्णय घेतला. गोलंदाजांनी धोनीचा निर्णय सार्थ ठरवत लखनौच्या फलंदाजांना एकापाठोपाठ एक तंबूत धाडले. लखनौला पहिला धक्का 18 धावांवर बसला. काइल मेयर्स याला 14 धावांवर मोईन अली याने तंबूत पाठवले. काइल मेयर्स याने 17 चेंडूत 14 धावांची खेळी केली. यामध्ये दोन चौकारांचा समावेश आहे. मेयर्सनंतर मनन वोहराही लगेच तंबूत परतला. वोहरा याने 11 चेंडूत एका चौकारासह 10 धावांचे योगदान दिले. सलामी जोडी तंबूत परतल्यानंतर लागोपाठ विकेट पडल्या. कृणाल पांड्याला खातेही उघडता आले नाही. तर करण शर्मा 16 चेंडूत 9 धावा काढून बाद झाला. रविंद्र जाडेजा याने मार्कस स्टॉयनिसला बाद करत लखनौच्या अडचणी आणखी वाढवल्या. मार्कस स्टॉयनिस सहा धावांवर माघारी परतला. आयुष बडोनी याने अखेरपर्यंत किल्ला लढवला. आयुष बडोनी याने 33 चेंडूत नाबाद 59 धावांची खेळी केली. बडोनी याने आपल्या या खेळीत 4 षटकार आणि दोन चौकार लगवाले. पाऊस येण्यापूर्वी आयुष बडोनी याने दमदार फलंदाजी करत लखनौचा डाव सावरला.
स्टॉयनिस बाद झाल्यानंतर लखनौचा डाव लवकर आटोपणार असेच म्हटले जात होते. पण युवा आयुष बदोनी आणि निकोलस पूरन यांनी लखनौच्या डावाला आकार दिला. निकोलस पूरन आणि बदोनी यांनी सहाव्या विकेटसाठी 48 चेंडूत 59 धावा जोडल्या. लखनौची ही सर्वात मोठी भागिदारी होय. पथीराना याने निकोलस पूरन यलाला बाद करत ही जोडी फोडली. पूरन याने 31 चेंडूत 20 धावांचे योगदान दिले. विस्फोटक निकोलस पूरन याला एकही चौकार आणि एकही षटकार मारता आला नाही. पूरन बाद झाल्यानंतर सामन्याची सर्व सुत्रे आयुष बडोनी याने आपल्या हातात घेतली. बडोनी याने आक्रमक फलंदाजी करत अर्धशतक झळकावले. बडोनीच्या अर्धशतकाच्या बळावर लखनौचा संघ 120 ची धावसंख्या पार करु शकला.
चेन्नईची भेदक फिरकी -
चेन्नईच्या फिरकी गोलंदाजांनी अचूक टप्प्यावर मारा करत लखनौच्या फलंदाजांना तंबूत धाडले. रविंद्र जाडेजा, मोईन अली आणि महिश तिक्ष्णा यांनी पाच फलंदाजांना तंबूचा रस्ता दाखवला. महिश तिक्ष्णा आणि मोईन अली यांनी प्रत्येकी दोन दोन विकेट घेतल्या. तर रविंद्र जाडेजा याने एका फलंदाजाला तंबूचा रस्ता दाखवला. मोईन अली याने चार षटकात 13 धावा खर्च केल्या. महिश तिक्ष्णा याने चार षटकात 37 धावा दिल्या. रविंद्र जाडेजा याने तीन षटकात 11 धावा दिल्या. दीपक चाहर याने चार षटकात 41 धावा दिल्या.
महत्त्वाच्या बातम्या
ट्रेंडिंग न्यूज
