India A vs Afghanistan A: कॅप्टन तिलक वर्मा, वैभव सूर्यवंशी, ऋतुराज गायकवाड अशी रथी महारथी असतानाही नवख्या अफगाणिस्तानचा टीम इंडियाला पराभवाचा धक्का!
India A vs Afghanistan A: प्रथम फलंदाजी करताना भारत 'अ' संघाने 49 षटकांत 9 गडी गमावून 349 धावांचा डोंगर उभा केला. मात्र, अफगाणिस्तान 'अ' संघाने धावांचा पाठलाग करताना शानदार प्रत्युत्तर दिले.
India A vs Afghanistan A: श्रीलंकेतील दांबुलात तिरंगी 'अ' सिरीज 2026 च्या दुसऱ्या सामन्यात भारत 'अ' संघाला अफगाणिस्तान 'अ' संघाकडून निराशाजनक पराभवाला सामोरे जावे लागले. पावसामुळे बाधित झालेल्या या सामन्याचा निकाल डकवर्थ-लुईस-स्टर्न (DLS) पद्धतीने लावण्यात आला, ज्यात अफगाणिस्तान 'अ' संघाला 4 धावांनी विजेता घोषित करण्यात आले. प्रथम फलंदाजी करताना भारत 'अ' संघाने 49 षटकांत 9 गडी गमावून 349 धावांचा डोंगर उभा केला. मात्र, अफगाणिस्तान 'अ' संघाने धावांचा पाठलाग करताना शानदार प्रत्युत्तर दिले.
349 धावांचा डोंगर उभा करूनही पराभव
अफगाणिस्तानने अवघ्या 25.5 षटकांत 2 गडी गमावून 177 धावा केल्या होत्या. पावसामुळे खेळ पुन्हा सुरू होऊ शकला नाही. जेव्हा सामना थांबवण्यात आला, तेव्हा डकवर्थ-लुईस-स्टर्न (DLS) गणनेनुसार अफगाणिस्तान 'अ' संघ लक्ष्यापेक्षा 4 धावांनी पुढे होता.हा निकाल भारत 'अ' संघासाठी एक मोठा धक्का आहे, कारण 349 धावांचा डोंगर उभा करूनही संघाला विजय मिळवता आला नाही. दुसरीकडे, अफगाणिस्तान 'अ' संघाने आक्रमक फलंदाजी आणि उत्तम धावगतीच्या जोरावर सामना जिंकला.
अफगाणिस्तानची आक्रमक सुरुवात
अफगाणिस्तान 'अ' संघाने आक्रमक सुरुवात केली. हसन इस्किलने 29 चेंडूंमध्ये 34 धावा करून संघाला वेगवान सुरुवात करून दिली. तथापि, तो अर्शद खानच्या गोलंदाजीवर बाद झाला. त्यानंतर कर्णधार इम्रान मीरने सूत्रे हाती घेतली आणि शानदार फलंदाजी करत 70 चेंडूंमध्ये नाबाद 75 धावा केल्या. त्याने सहा चौकार आणि दोन षटकार मारले. दुसऱ्या टोकाकडून, बहीर शाहनेही संयम आणि आक्रमकतेचा उत्तम मिलाफ दाखवला. त्याने 52 चेंडूंमध्ये पाच चौकारांसह नाबाद 51 धावा केल्या.
जेव्हा अनुकूल रॉयने खालिद तनीवालला केवळ दोन धावांवर बाद केले, तेव्हा अफगाणिस्तान 'अ' संघाला दुसरा धक्का बसला. त्यानंतर, इम्रान मीर आणि बहीर शाह यांनी इंडिया 'अ' संघाला कोणतीही संधी दिली नाही. या दोन फलंदाजांनी तिसऱ्या विकेटसाठी नाबाद 126 धावांची भागीदारी करून सामना पूर्णपणे अफगाणिस्तानच्या बाजूने फिरवला. जेव्हा पावसामुळे खेळ थांबवण्यात आला, तेव्हा अफगाणिस्तान 'अ' संघाने 25.5 षटकांत दोन गडी गमावून 177 धावा केल्या होत्या. संघाचा धावगती दर 6.85 होता आणि डकवर्थ-लुईस-स्टर्न (DLS) गणनेनुसार ते लक्ष्यापेक्षा चार धावांनी पुढे होते. पावसामुळे खेळ पुन्हा सुरू होऊ शकला नाही आणि अफगाणिस्तान 'अ' संघाला विजेता घोषित करण्यात आले.
तत्पूर्वी, या सामन्यात इंडिया 'ए' संघाने शानदार फलंदाजी केली. वैभव सूर्यवंशी (44), प्रभसिमरन सिंग (84), ऋतुराज गायकवाड (66) आणि तिलक वर्मा (66) यांनी उत्कृष्ट खेळी केली. सूर्यांश शेडगेही शेवटी फलंदाजीला आला आणि त्याने वेगवान 40 धावा केल्या.
इतर महत्वाच्या बातम्या
महत्त्वाच्या बातम्या
