IND vs ENG, 2nd ODI: टीम इंडियाचा धावांचा डोंगर, केएल राहुलचं शानदार शतक, इंग्लंडसमोर 337 धावांचं आव्हान

IND vs ENG 2nd ODI, LIVE : केएल राहुलचं शानदार शतक तसेच कर्णधार विराट कोहली, ऋषभ पंतच्या शानदार अर्धशतकांच्या बळावर टीम इंडियानं 50 षटकांत 336 धावांचा डोंगर उभारला आहे. इंग्लंडला आता विजयासाठी 337 धावांची गरज आहे. 

india_odi

IND vs ENG 2nd ODI, LIVE : पहिला एकदिवसीय सामना 66 धावांनी जिंकल्यानंतर टीम इंडियानं दुसऱ्या एकदिवसीय सामन्यात देखील इंग्लंडसमोर धावांचा डोंगर उभा केला आहे. केएल राहुलचं शानदार शतक तसेच कर्णधार विराट कोहली, ऋषभ पंतच्या शानदार अर्धशतकांच्या बळावर टीम इंडियानं 50 षटकांत 6 बाद 336 धावांचा डोंगर उभारला आहे. इंग्लंडला आता विजयासाठी 337 धावांची गरज आहे. 

इंग्लंडनं नाणेफेक जिंकून प्रथम क्षेत्ररक्षण स्विकारलं. प्रथम फलंदाजीला उतरलेल्या टीम इंडियाची सुरुवात चांगली झाली नाही. पहिल्या सामन्यात शानदार खेळी करणारा सलामीवीर शिखर धवन अवघ्या चार धावांवर बाद झाला तर रोहित शर्मा देखील 25 धावांवर बाद झाला. यानंतर कर्णधार विराट कोहलीनं राहुल सोबत शतकी भागीदारी करत डाव सावरला. कोहली 66 धावांवर बाद झाला. 

दुसरीकडे राहुलनं शानदार खेळी करत आपलं शतक पूर्ण केलं. त्यांनं 114 चेंडूत 108 धावा केल्या. या खेळीत त्यानं 7 चौकार आणि 2 षटकार लगावले. तर ऋषभ पंतनं आक्रमक पद्धतीनं खेळी करत अवघ्या 40 चेंडूत 77 धावांची खेळी केली. त्यानं सात षटकार आणि तीन चौकारांसह आपली खेळी साकारली. 

यानंतर आलेल्या हार्दिक पांड्यानं देखील चार षटकारांसह 16 चेंडूत 35 धावा ठोकल्या. क्रुणाल पांड्यानंही 12 धावांचं योगदान दिलं.