MCA Elections 2022 : आशिष शेलारांच्या क्लबकडून शरद पवार करणार मतदान, मुंबई क्रिकेट असोसिएशन अध्यक्षपदाची निवडणूक 20 ऑक्टोबरला

MCA Elections 2022 : मुंबई क्रिकेट असोसिएशनच्या अध्यक्षपदासाठी होणारी निवडणूक आधी सप्टेंबरमध्ये होणार होती. पण आता ही तारीख 20 ऑक्टोबर करण्यात आली असून भाजप नेते आशिष शेलार आणि माजी क्रिकेटर संदीप पाटील ही दोन नावं चर्चेत आहेत.

MCA Elections

MCA President Election : मुंबई क्रिकेट असोसिएशनच्या अध्यक्षपदाची निवडणूक 20 ऑक्टोबरला होणार आहे. मुंबई क्रिकेट असोसिएशनच्या यंदाच्या निवडणुकीत राष्ट्रवादी काँग्रेसचे अध्यक्ष शरद पवार (Sharad Pawar) हे भाजप मुंबई अध्यक्ष आशिष शेलार (Ashish Shelar) यांच्या क्लबकडून मतदान करणार असल्याची माहिती समोर आली आहे. एमसीएच्या निवडणुकीसाठी मतदार यादी आज प्रसिद्ध करण्यात आली आहे. त्यात आशिष शेलार यांच्या पायोनियर क्लबकडून शरद पवार मतदान करतील हे स्पष्ट झालं आहे. यंदाच्या निवडणूकीत अध्यक्षपदासाठी एक राजकीय नेता आणि माजी क्रिकेटर यांच्यात लढत रंगण्याची शक्यता आहे. यावेळी राजकीय नेता म्हणजे भाजपचे नेते आशिष शेलार आणि माजी क्रिकेटर म्हणून संदीप पाटील (Sandeep Patil) या दोघांची नावं चर्चेत आहेत.

मुंबई क्रिकेट असोसिएशनच्या  (Mumbai Cricket Association) अर्थात एमसीएच्या (MCA) त्रैवार्षिक निवडणुकीची चर्चा आता शिगेला पोहोचली आहे.  एमसीएची ही बहुचर्चित निवडणूक मागील महिन्यात 28 सप्टेंबरला होण्याची शक्यता होती. पण काही कारणांमुळे त्यादरम्यान निवडणूक न होता ती पुढे ढकलण्यात आली. आता समोर आलेल्या माहितीनुसार मुंबई क्रिकेट असोसिएशनच्या अध्यक्षपदासाठी 20 ऑक्टोबरला निवडणूक होणार आहे. मुंबई क्रिकेट असोसिएशनच्या त्रैवार्षिक निवडणुकीसाठी शरद पवार यांच्या गटाकडून माजी कसोटीपटू संदीप पाटील हे अध्यक्षपदाचे आणि नवीन शेट्टी हे उपाध्यक्षपदाचे उमेदवार आहेत. भाजपचे मुंबई अध्यक्ष आणि आमदार आशिष शेलार हेही अध्यक्षपदाची निवडणूक लढवणार असल्याने अध्यक्षपदासाठी संदीप पाटील आणि आशिष शेलार यांच्यात थेट लढत पाहायला मिळू शकते. दरम्यान, पवार गटाकडून सचिवपदासाठी अजिंक्य नाईक, संयुक्त सचिवपदासाठी गौरव पय्याडे आणि कोषाध्यक्षपदासाठी जगदीश आचरेकर हे उमेदवार असतील. त्याशिवाय कार्यकारिणीच्या नऊ जागांसाठीही पवार गटाकडून अभय हडप कौशिक गोडबोले, संदीप विचारे, प्रशांत सावंत, दाऊद पटेल, विघ्नेश कदम, राजेश महंत, सुरेंद्र हरमळकर आणि सुरेंद्र शेवाळे यांची नावं घोषित करण्यात आली आहेत.

11 वर्षानंतर पुन्हा राजकीय नेता विरुद्ध माजी क्रिकेटर

विशेष म्हणजे तब्बल 11 वर्षांनंतर पुन्हा एकदा क्रिकेटपटू विरुद्ध राजकीय नेत्यामध्ये एमसीए अध्यपदासाठी लढत रंगणार आहे. याआधी म्हणजेच 2011 मध्ये माजी क्रिकेटर दिलीप वेंगसरकर आणि माजी मुख्यमंत्री विलासराव देशमुख यांच्यात अध्यपदासाठी निवडणूक झाली होती. त्यावेळी विलासरावांनी वेंगसरकरांना मात दिली होती. आता यंदाही राजकीय नेता क्रिकेटरवर भारी पडणार की संदीप पाटील आशिष शेलारांना मात देणार हे पाहणं औत्सुक्याचं ठरेल. 

हे देखील वाचा -