Asia Cup Trophy Ind vs Pak: भारताला ट्रॉफी मिळणार की नाही?, 5 क्रिकेट बोर्ड ठरवणार, टीम इंडियाला कोणी कोणी पाठिंबा दिला, पाहा A टू Z माहिती
Asia Cup Trophy Ind vs Pak: अंतिम सामना जिंकल्यानंतरही भारतीय संघाला अद्याप ट्रॉफी मिळालेली नाही. याचदरम्यान, काल आशियाई क्रिकेट कौन्सिलची दुबईत बैठक झाली. या बैठकीत महत्वाचा निर्णय घेतल्याची माहिती समोर आली आहे.
Asia Cup Trophy Ind vs Pak: भारतीय संघाने (Team India) आशिया चषक (Asia Cup 2025) जिंकून दोन दिवस उलटले आहेत, पण ट्रॉफीवरील वाद सुरूच आहे. आशियाई क्रिकेट कौन्सिलचे अध्यक्ष आणि पाकिस्तानचे मंत्री मोहसीन नक्वीच्या (Mohsin Naqvi) हस्ते आशिया चषक आणि वैयक्तिक पदकं स्वीकारण्यास भारतीय संघानं स्पष्ट नकार दिला होता. त्यानंतर मोहसीन नक्वी ट्रॉफी घेऊन मैदानाच्या बाहेर निघून गेले. अंतिम सामना जिंकल्यानंतरही भारतीय संघाला अद्याप ट्रॉफी मिळालेली नाही. याचदरम्यान, काल (30 सप्टेंबर) आशियाई क्रिकेट कौन्सिलची दुबईत बैठक झाली. या बैठकीत महत्वाचा निर्णय घेतल्याची माहिती समोर आली आहे.
भारत, बांगलादेश, श्रीलंका, अफगाणिस्तान आणि पाकिस्तान या देशांच्या क्रिकेट मंडळांची या वादावर तोडगा काढण्यासाठी बैठक होऊ शकते. भारत, बांगलादेश, श्रीलंका, अफगाणिस्तान आणि पाकिस्तान क्रिकेट बोर्ड आशिया चषकाच्या ट्रॉफीबाबत निर्णय घेतील. दरम्यान, काल झालेल्या आशियाई क्रिकेट कौन्सिलच्या बैठकीत मलेशिया आणि इंडोनेशियासह अनेक सदस्य देशांनी भारताची बाजू घेतली आणि मोहसीन नक्वी यांना ट्रॉफी भारताला सोपवण्याची विनंती केली. त्यामुळे आशियामधील मलेशिया आणि इंडोनेशियासह अनेक सदस्य देशांचा देखील बीसीसीआयला पाठिंबा आहे.
नेमकं काय घडलं? (Ind vs Pak Final What happened?)
भारतीय संघाचे कुलदीप यादव, अभिषेक शर्मा आणि तिलक वर्मा या भारतीय खेळाडूंनी आपली वैयक्तिक पारितोषिकं अन्य मान्यवरांच्या हस्ते स्वीकारली. पहलगाममध्ये पाकिस्तानी दहशतवाद्यांनी भारतीय पर्यटकांवर केलेल्या हल्ल्याच्या पार्श्वभूमीवर भारतीय खेळाडूंनी तिन्ही सामन्यांमध्ये पाकिस्तानी खेळाडूंशी हस्तांदोलन करणं कटाक्षानं टाळलेलं. तसंच फायनलच्या नाणेफेकीआधी फोटो शूटला जाणंही टाळलेलं. आशिया चषक आणि वैयक्तिक पदकं स्वीकारण्यास नकार दिला. त्यामुळं आशिया चषकाचा पारितोषिक वितरण सोहळा तासभरापेक्षा उशिरानं सुरु झाला. तेवढा वेळ मोहसीन नक्वी हे एकटेच व्यासपीठावर उपस्थित होते.
ट्रॉफीबाबत आयसीसीचे नियम काय?(ICC rules regarding trophies?)
ट्रॉफी स्वीकारण्यास कर्णधाराने नकार देणे आयसीसीच्या आचारसंहितेअंतर्गत येऊ शकते, परंतु त्याबाबत कोणताही विशिष्ट नियम नाही. हे क्रिकेटच्या भावनेविरुद्ध असेल. भारतीय कर्णधार सूर्यकुमार यादवला ट्रॉफी का स्वीकारली नाही याचे स्पष्टीकरण द्यावे लागेल आणि त्यानंतर स्पर्धा संस्था (ACC) किंवा ICC याबाबत निर्णय घेईल. सदर घटनेप्रकरणी कोणत्याही नियमाचे उल्लंघन झाले आहेत का आणि जर तसे असेल तर उल्लंघनांसाठी कोण जबाबदार होते आणि कोणते दंड आकारले जाऊ शकतात, याबाबत आयसीसीकडून तपास केला जाऊ शकतो.
संबंधित बातमी:
महत्त्वाच्या बातम्या
