Raj Thackeray Uddhav Thackeray Rally: लोकल ट्रेनच्या एकाच सीटवर बसून राज अन् उद्धव ठाकरे विजयी मेळाव्याला निघाले

Raj Thackeray Uddhav Thackeray: राज ठाकरे आणि उद्धव ठाकरे हे 20 वर्षांनी एकत्र येणार आहेत. त्यामुळे आजच्या कार्यक्रमाला ठाकरे गट आणि मनसेचे कार्यकर्ते मोठ्या संख्येने मुंबईकडे निघाले आहेत.

Raj Thackeray Uddhav Thackeray

त्रिभाषा धोरणातील हिंदीच्या सक्तीविरोधातील निर्णय सरकारने मागे घेतल्यानंतर उद्धव ठाकरे यांची शिवसेना आणि राज ठाकरे यांच्या मनसेकडून आज, शनिवारी आयोजित करण्यात आलेल्या विजयी मेळाव्यासाठी जोरदार तयारी करण्यात आली आहे.

सकाळी १० वाजता वरळी डोममध्ये हा मेळावा पार पडणार असून त्यासाठी जागोजागी बॅनरबाजी करण्यात आली. ‘आवाज मराठीचा’ या भावनिक संदेशासह ठाकरे बंधूंनी जनतेला या मेळाव्याचे निमंत्रण दिले आहे.

या मेळाव्यासाठी राज्यभरातून मनसे आणि शिवसेनेचे कार्यकर्ते मुंबईच्या दिशेने निघाले आहेत.

पालघरमधून मनसे आणि शिवसेनेचे कार्यकर्ते मेळाव्यासाठी लोकल ट्रेन पकडून मुंबईला रवाना झाले. यावेळी त्यांची वेशभूषा लक्ष वेधून घेणारी होती.

पालघरमधील मनसे-शिवसेनेच्या कार्यकर्त्यांनी राज ठाकरे आणि उद्धव ठाकरे यांचे मास्क घातले होते. या सगळ्यांनी लोकल ट्रेनने प्रवास केला. त्यांनी घातलेले मास्क अनेकांचे लक्ष वेधून घेत होते.

राज ठाकरे आणि उद्धव ठाकरे या दोन्ही भावांचे मनोमिलन होत असल्याने मनसे आणि ठाकरे गटाचे कार्यकर्ते अत्यंत उत्साहात आहेत.

या कार्यकर्त्यांनी गुणरत्न सदावर्ते यांच्यावर टीका करणारे बॅनर्स झळकावले.

राज ठाकरे आणि उद्धव ठाकरे आपल्या भाषणात काय बोलणार, याची उत्सुकता सर्वांना लागली आहे.

एकनाथ शिंदे आणि देवेंद्र फडणवीस यांनी हिंदी भाषेच्या आणि भाषिकांच्या बाजूने भूमिका घेतल्याने राज-उद्धव हे ठाकरे बंधू काय आसूड ओढणार, याकडे राजकीय वर्तुळाचे लक्ष लागले आहे.