Gold Rate : सोन्याचे दर उच्चांकावरुन 25 टक्क्यांनी घटले, भविष्यात सोन्याचे दर आणखी गडगडणार, तज्ज्ञांचा मोठा अंदाज

Gold Price Rate : सोने आणि चांदीच्या दरानं जानेवारी महिन्यात उच्चांक गाठला होता. सोने दरात उच्चांकाच्या तुलनेत जवळपास 25 टक्के घसरण झाली आहे.

सोन्याचे दर घसरणार, तज्ज्ञांचा अंदाज

आंतरराष्ट्रीय बाजारात सोन्याच्या दरात घसरण सुरुच आहे. या वर्षी जानेवारी महिन्यात सोन्याचा दर 5595 डॉलर प्रति औंसवर पोहोचला होता. मात्र, त्यानंतर त्यामध्ये घसरण पाहायला मिळाली आहे. सध्याचे दर पाहता उच्चांकाच्या तुलनेत सोन्याचे दर 25 टक्क्यांनी घसरले आहेत. जानेवारी महिन्यात सोने दरात वाढ होण्याची अपेक्षा ठेवून ज्यांनी सोन्यात गुंतवणूक केली होती त्यांचं मोठं नुकसान झालं आहे.

तज्ज्ञांच्या मते आठवड्याच्या शेवटी भारतात आणि विदेशात सोन्याच्या दरात तेजी दिसून आली असली तर ती तेजी कायम राहण्याची आशा नाहीये. आंतरराष्ट्रीय बाजारात सोन्याचे दर 4222 डॉलर प्रति औंसवर पोहोचले आहेत. भारतात एमसीएक्सवर सोन्याचे दर 150675 रुपये 10 ग्रॅम इतके झाले आहेत.

स्ट्रेट स्ट्रीट इनवेस्टमेंट मॅनेजमेंटचे कमोडिटी विश्लेषक आकाश दोशी यांनी सोने दरासंदर्भातील आव्हानं मांडली आहेत. अमेरिकेतली फेड रिझर्व्हकडून व्याज जास्त ठेवलं जाण्याची शक्यता आहे. याशिवाय डॉलर मजबूत असणं या दोन कारणांमुळं सोन्याच्या दरांवर दबाव कायम राहील. जेव्हा अमेरिका आणि इराण यांच्यातील संघर्ष संपून क्रूड ऑईलचे दर 80 डॉलरप्रति बॅरल पर्यंत पोहोचतील तेव्हा सोन्याच्या दरात तेजी येऊ शकते, असं त्यांनी म्हटलं.

यूबीएसच्या अंदाजानुसार सोन्याच्या दरात घसरण कायम राहू शकते. सोन्याचे दर शॉर्ट टर्ममध्ये घसरुन 3850 -4000 डॉलर प्रति औंस पर्यंत जाऊ शकतात. अमेरिकन फेड रिझर्व्हकडून व्याज दर वाढवल्यास सोन्याच्या दरात घसरण होऊ शकते. अमेरिकन रोजगाराचे आकडे अपेक्षा चांगले व्याज दर अधिक ठेवले जाऊ शकतात.

काही विश्लेषकांचं लक्ष केंद्रीय बँकांकडून केल्या जाणाऱ्या सोन्याच्या खरेदीकडे लागलं आहे. यूबीएसच्या अंदाजानुसार बँकांची सोन्याची खरेदी 750-1000 टन डॉलर दरम्यान राहू शकते. सोन्याचे दर 3850 -4000 डॉलर प्रति औंस पर्यंत खाली आल्यास खरेदीची चांगली संधी असल्याचं सांगण्यात आलं आहे.

दरम्यान, 12 जून रोजी 24 कॅरेट सोन्याचा एका तोळ्याचा दर 147800 रुपयांवर पोहोचला होता. 22 कॅरेट सोन्याचा दर 1 लाख 35 हजार रुपयांवर आहे.