घरापर्यंत पाईपलाईन अन् नळ, पण पाण्याच्या टाकीचाच पत्ताच नाही; वेदिकाच्या दुर्दैवी मृत्यूनंतर प्रशासनाच्या अहवालातून धक्कादायक खुलासा समोर
Vedika Chavan Death Case : यवतमाळच्या आर्णी तालुक्यातल्या काठोडा पारधी बेड्यावरील पिण्याच्या पाण्याच्या वितरण व्यवस्थेबद्दल प्रशासनाचा अहवाल समोर आला असून त्यातून काही धक्कादायक खुलासा समोर आला आहे.
Vedika Chavan Death Case यवतमाळ : यवतमाळ जिल्ह्यातील आर्णी तालुक्यातल्या काठोडा पारधी बेड्यावर राहणाऱ्या आणि पाण्यासाठी भटकंती करणाऱ्या 12 वर्षीय वेदिक चव्हाणचा दुर्दैवी मृत्यू (Vedika Chavan Death Case) झालाय. वेदिकाच्या दुर्दैवी मृत्यूची आणि त्यासाठी पाण्याचा दुर्भिक्ष कारणीभूत असल्याचे सत्य एबीपी माझाने दाखवल्यानंतर राज्यभरात संतापाची लाट पसरली आहे. अशातच या घटनेनंतर अधिकाऱ्यांच्या पथकाची पारधी बेड्याला भेट देत वेदिकाच्या कुटुंबियाची भेट घेतली. तर दुसरीकडे या पारधी बेड्यावरील पिण्याच्या पाण्याच्या वितरण व्यवस्थेबद्दल प्रशासनाचा अहवाल समोर आला असून त्यातून काही धक्कादायक खुलासा समोर आला आहे.
प्रत्येक घरापर्यंत पाईपलाईन, अन् नळ पण पाणी टाकीच अर्धवट
जिल्हा परिषद पाणी पुरवठा विभागाने जिल्हा प्रशासनाला अहवाल दिला असून काठोडा गाव आणि जवळच्या पारधी बेडा मिळून 43 लाख 55 हजारची जलजीवन मिशन अंतर्गत काम मजूर केल्याचे अहवालात नमूद करण्यात आलंय. तर काठोडा पारधी बेड्यावरील पाण्याच्या पाईपलाईनचे काम पूर्ण झाले आहे. मात्र 5000 लिटर क्षमतेच्या पाणी टाकीचे काम, तसेच उर्ध्व नलिका म्हणजेच जमिनीवरील पाईपलाईन आणि साठवणुकीसाठीच्या टाकीला जोडणारे पाईप यांचे काम अपूर्ण आहे. तसेच सोलर ट्यूबवेलचे कामही अपूर्ण असल्याचे अहवालात नमूद करण्यात आलंय.
म्हणजेच गावात प्रत्येक घरापर्यंत पाईपलाईन टाकून नळासाठीचा पाईप प्रत्येक घरासमोर उभा केला. मात्र ज्या पाणी टाकीतून पाणीपुरवठा करायचा आहे, ती पाणी टाकीच तयार केली नाही. काठोडा पारधी बेड्यावरील पाणी साठवण टाकीसाठी आवश्यक कागदपत्रे ग्रामपंचायतनेन दिल्यामुळे टाकीचे काम पूर्ण झाले नसल्याचा खुलासा या अहवालातून समोर आला आहे.
अधिकाऱ्यांच्या पथकाची पारधी बेड्याला भेट
आर्णी तालुक्यातील काठोडा पारधी बेडा येथे काल अरुणावती नदीच्या काठी धुणे धुवायला गेलेल्या एका मुलीचा नदीच्या डोहात पाय घसरुन दुर्दैवी मृत्यू झाला. या घटनेची दखल घेत अधिकाऱ्यांच्या पथकाने पारधी बेडा येथे मुलीच्या कुटुंबियाची भेट घेतली. काठोडा पारधी बेडा येथील काही मुली सकाळी कपडे धुण्यासाठी वस्तीच्या उत्तरेस असलेल्या अरुणावती नदीच्या काठी गेल्या होत्या. नदीतील डोहामध्ये वेदिका रुणेश चव्हाण ही 12 वर्षाची मुलगी पाय घसरुण पडली. त्यामध्ये तिचा पाण्यात बुडुन दुर्दैवी मृत्यू झाला. घटनेच्या अनुषंगाने काल (18 एप्रिल) पाणी व स्वच्छता विभागाचे उपमुख्य कार्यकारी अधिकारी, पाणी पुरवठाचे कार्यकारी अभियंता, आर्णीचे गटविकास अधिकारी, पाणी पुरवठा उपअभियंता यांच्यासह इतर अधिकारी यांनी काठोडा येथील पारधी बेडाला भेट देवून मुलीच्या कुटुंबियांची भेट घेतली.
यावेळी गावातील सरपंच, सदस्य व ग्रामस्थ उपस्थित होते. ग्रामस्थ व मुलीच्या वडीलांसोबत चर्चा केली असता घटनेच्या दिवशी सकाळी 8 वाजता मैत्रीणींसोबत वेदीका कपडे धुण्यासाठी अरुणावती नदीच्या काठी गेली होती. त्यामध्ये नदीतील डोहामध्ये पाय घसरुण वेदीका पडली. त्यामध्ये तिचा बुडुन दुर्दैवी मृत्यु झाला, असे सांगितले. या वस्तीमध्ये पिण्याच्या पाण्यासाठी 1 हजार लिटर क्षमतेची पाण्याची टाकी अस्तित्वात असलेल्या बोअरवेलवर 1 अश्वशक्ती क्षमतेच्या सौर पंपाद्वारे टाकी भरुन वस्तीला पाणी पुरवठा करण्यात येत आहे. वस्तीत आणखी एक हातपंप असुन त्याद्वारे सुध्दा पाणी पुरवठा सुरु आहे.
सद्यस्थितीत बोअरवेलच्या सौर पंपातून पाणी पुरवठा
सद्यस्थितीत पारधी बेडा येथील बोअरवेलच्या सौर पंपातून पाणी पुरवठा सुरु आहे. सदर वस्तीमध्ये जलजिवन मिशन योजनेंतर्गत नव्याने ५ हजार लिटर क्षमतेची पाण्याची टाकी, सोलर पॅनल व पंप, उर्ध्व नलिका, वितरण व्यवस्था व घरघुती नळ जोडणीच्या कामाचा समावेश आहे. त्यापैकी वितरण व्यवस्था व नळ जोडणीचे काम पुर्ण करण्यात आले असून पाण्याच्या टाकीसाठी जागा उपलब्ध न झाल्यामुळे काम करता आले नाही. सद्यस्थितीत पारधी बेडा वस्तीमध्ये असलेले १ सोलरपंप व १ हातपंपाद्वारे ग्रामपंचायत मार्फत पाणी पुरवठा सुरु असल्याचे पाणीपुरवठा विभागाचे कार्यकारी अभियंता व आर्णी गटविकास अधिकारी यांनी कळविले आहे.
हे ही वाचा
महत्त्वाच्या बातम्या
