एकतर करार स्वीकारा, नाहीतर पूर्णपणे नष्ट करणार, डोनाल्ड ट्रम्प यांचा पुन्हा एकदा इराणला इशारा 

पश्चिम आशियामध्ये सुरु असलेल्या युद्ध आणि राजनैतिक तणावाच्या पार्श्वभूमीवर, अमेरिकेचे अध्यक्ष डोनाल्ड ट्रम्प यांनी इराणला पुन्हा एकदा कडक इशारा दिला आहे.

US Iran Conflict

Source : Getty Images

US Iran Conflict : पश्चिम आशियामध्ये सुरु असलेल्या युद्ध आणि राजनैतिक तणावाच्या पार्श्वभूमीवर, अमेरिकेचे अध्यक्ष डोनाल्ड ट्रम्प यांनी इराणला पुन्हा एकदा कडक इशारा दिला आहे. एकाच निवेदनातून ट्रम्प यांची दोन भिन्न भूमिका स्पष्ट केल्या आहेत. एका बाजूला, त्यांनी इराणची पायाभूत सुविधा पूर्णपणे नष्ट करण्याची धमकी दिली, तर दुसऱ्या बाजूला, पाकिस्तानमध्ये होणाऱ्या चर्चेच्या दुसऱ्या फेरीसाठी एका "न्याय्य आणि वाजवी" कराराचा प्रस्ताव देखील मांडला आहे.

शस्त्रबंदीच्या उल्लंघनामुळे ट्रम्प संतापले

ट्रम्प यांनी इराणवर गंभीर आरोप केले. इराणने काल होर्मुझच्या सामुद्रधुनीमध्ये गोळीबार करण्याचा निर्णय घेतला, हे आमच्या शस्त्रबंदी कराराचे संपूर्ण उल्लंघन आहे. त्यापैकी अनेक गोळ्या एका फ्रेंच जहाजावर आणि एका ब्रिटिश मालवाहू जहाजावर झाडण्यात आल्याची माहिती त्यांनी दिली. 

इस्लामाबादमध्ये महत्त्वपूर्ण चर्चा होणार

धमक्यांच्या पार्श्वभूमीवर, ट्रम्प यांनी राजनैतिक चर्चेचा मार्ग खुला ठेवल्याचे संकेत दिले आहेत. त्यांनी जाहीर केले की, त्यांचे प्रतिनिधी सोमवारी (20एप्रिल) संध्याकाळी चर्चेसाठी पाकिस्तानची राजधानी इस्लामाबाद येथे दाखल होत आहेत. तिथे एका करारावर वाटाघाटी होतील, ज्याचे वर्णन त्यांनी अत्यंत न्याय्य आणि वाजवी करार असे केले आहे.

नाकेबंदी आणि आर्थिक नुकसानीचा संदर्भ

ट्रम्प यांनी होर्मुझची सामुद्रधुनी बंद करण्याच्या इराणच्या घोषणेवर टीका केली आणि म्हटले की, अमेरिकेच्या नाकेबंदीने ती आधीच बंद केली आहे. ट्रम्प यांच्या मते, इराण म्हणत आहे की ते मार्ग बंद करत आहेत, जे विचित्र आहे कारण आमच्या 'नाकेबंदी'ने तो आधीच बंद केला आहे. ते नकळतपणे आम्हाला मदत करत आहेत. हा मार्ग बंद झाल्यामुळे इराणला दररोज 500 दशलक्ष डॉलर्सचे नुकसान होत आहे, तर अमेरिकेला कोणतेही नुकसान होत नाही. किंबहुना, अनेक जहाजे आता इंधन भरण्यासाठी टेक्सास, लुइझियाना आणि अलास्काकडे जात आहेत.

आता चांगुलपणा नाही

ट्रम्प यांनी इशारा दिला की, जर इराणने करार स्वीकारला नाही, तर त्याचे परिणाम गंभीर असतील. मला आशा आहे की ते हे स्वीकारतील, कारण जर त्यांनी तसे केले नाही, तर अमेरिका इराणमधील प्रत्येक वीज प्रकल्प आणि प्रत्येक पूल उडवून देईल. गेल्या 47 वर्षांत इतर राष्ट्राध्यक्षांना जे जमले नाही ते साध्य करणे ते आपला सन्मान समजतील. त्यांनी स्पष्टपणे सांगितले, "इराणची संहारक यंत्रणा नष्ट करण्याची वेळ आली आहे असे ट्रम्प म्हणाले. 

सर्वाचं लक्ष चर्चेच्या दुसऱ्या फेरीकडे 

अमेरिका आणि इराण यांच्यातील हा थेट संघर्ष 28 फेब्रुवारी रोजी तेहरानवर अमेरिका आणि इस्रायलने केलेल्या हवाई हल्ल्यांनी सुरू झाला. गेल्या आठवड्यात एक युद्धविराम झाला, ज्यात ट्रम्प यांनी संपूर्ण इराणी संस्कृती नष्ट करण्याची धमकी दिली. पाकिस्तानने मध्यस्थी केलेल्या दोन आठवड्यांच्या युद्धविरामांतर्गत, इराणने होर्मुझच्या सामुद्रधुनीतून जहाजांना जाण्याची परवानगी देण्याचे मान्य केले. गेल्या आठवड्याच्या अखेरीस इस्लामाबादमध्ये झालेली चर्चेची पहिली फेरी अनिर्णित राहिली. सध्या, अमेरिकेने आपली नाकेबंदी कायम ठेवली आहे, तर इराणने अमेरिकेवर "विश्वासघाताचा" आरोप करत शनिवारी पुन्हा निर्बंध लादले. आता सर्वांचे लक्ष सोमवारी इस्लामाबादमध्ये होणाऱ्या चर्चेच्या दुसऱ्या फेरीकडे लागले आहे.