अफगाणिस्तानमध्ये रिपोर्टिंग करताना पुलित्जर पुरस्कार प्राप्त भारतीय पत्रकार दानिश सिद्दीकी यांची हत्या
अफगाणिस्थानमध्ये रिपोर्टिंग करणारे रॉयटर्सचे पत्रकार दानिश सिद्दीकी यांची हत्या करण्यात आली आहे. त्यांना 2018 मध्ये सहकारी अदनान आबिदी यांच्यासह पुलित्जर पुरस्कारनं सन्मानित करण्यात आलं होतं
काबुल : अफगाणिस्तानमध्ये रिपोर्टिंग करत असलेले रॉयटर्सचे पत्रकार दानिश सिद्दीकी यांची हत्या करण्यात आली आहे. दानिश सिद्दीकी अफगाणिस्थानमधील सध्याची परिस्थिती कव्हर करण्यासाठी गेल्या काही दिवसांपासून अफगाणिस्थानात गेले होते. दानिश सिद्दीकी मूळचे दिल्लीतील रहिवाशी होते. अफगाणिस्थानातील स्थानिक वृत्तवाहिनीनं सुत्रांच्या हवाल्यानं दिलेल्या माहितीनुसार, दानिश सिद्दीकी यांची हत्या कांधार प्रांतातील स्पिन बोल्डक परिसरात करण्यात आली.
दरम्यान, अमेरिकेतील सैनिक परतल्यानंतर अफगाणिस्थानातील परिस्थिती गंभीर झाली आहे. सिद्दिकी देखील हीच परिस्थिती कव्हर करण्यासाठी तिथे गेले होते. सिद्दिकी यांनी आपल्या करिअरची सुरुवात एक टीव्ही रिपोर्टर म्हणून केली होती. त्यानंतर ते फोटो जर्नलिस्ट म्हणून काम करु लागले.
दानिश सिद्दीकी यांना 2018 मध्ये त्यांचे सहकारी अदनान आबिदी यांच्यासह पुलित्जर पुरस्कारनं सन्मानित करण्यात आलं होतं. त्यावेळी ते पुलित्जर पुरस्कार जिंकणारे पहिले भारतीय होते. दानिश यांनी रोहिंग्या शरणार्थी प्रकरणही कव्हर केलं होतं.
यापूर्वी दानिश सिद्दीकी यांनी 13 जून रोजी ट्वीट करत त्यांच्यावर हल्ला झाल्याची माहिती दिली होती की, ते ज्या वाहनातून प्रवास करत होते, त्या वाहनावर हल्ला झाल्याचं त्यांनी सांगितलं होतं. त्यांनी लिहिलं होतं की, "माझं नशीब चांगलं होतं की, मी या हल्ल्यातून सुखरुप बचावलो."
अफगाणिस्तानमध्ये सध्या सुरु असलेल्या हिंसाचाराचं रिपोर्टिंग करण्यासाठी दानिश सिद्दिकी सतत आपल्या कॅमेऱ्यात कैद करत होते. त्यांनी आपल्या ट्विटर हँडलवरुनही तेथील भीषण वास्तव दर्शवणारे अनेक फोटो शेअर केले होते.
महत्त्वाच्या इतर बातम्या :
महत्त्वाच्या बातम्या
