एक्स्प्लोर

कुलभूषण जाधव यांना काऊन्सलेर अॅक्सेस देण्यास पाकिस्तानचा नकार

Written By : एबीपी माझा वेब टीम | Updated at : 17 Apr 2017 11:29 PM (IST)

इस्लामाबाद : कुलभूषण जाधव यांना काऊन्सलेर अॅक्सेस देण्यास पाकिस्तानने नकार देऊन भारताच्या प्रयत्नांवर पुन्हा पाणी फेरलं आहे. जाधव यांची भेट पाकिस्ताननं नाकरल्याचं भारतीय अधिकाऱ्यांनी सांगितलं. विशेष म्हणजे, जाधव यांना वाचवण्यासाठी भारताकडे सर्व कायदेशीर पर्याय खुले असून, या सर्व ठिकाणी आम्ही कडाडून विरोध करु, असं पाक सैन्यानं स्पष्ट केलं. पाकिस्तान सैन्य दलाचे प्रवक्ते मेजर जनरल आशिफ गफूर यांनी सांगितलं की, ''पाकिस्तानी कायद्यानुसार आम्ही जाधव यांना काऊन्सेलर अॅक्सेस देऊ शकत नाही. जाधव पाकिस्तानविरोधी कारवायांमध्ये सहभागी होते. त्यामुळे त्यांना शिक्षा देण्याची जबाबदारी पाकिस्तानी सैन्याची आहे. आम्ही यावर कोणतीही तडजोड करण्यास तयार नाही.'' तसेच न्यायालयासमोर जाधव यांच्याविरोधातील खटल्याची सुनावणी सुरु होती, त्यावेळी त्यांना सर्व कायदेशीर पर्यायांचा वापर करु दिल्याचा दावाही गफूर यांनी केला आहे. ''न्यायालयासमोर जाधव यांच्याविरोधात जे पुरावे सादर केले, ते कोणत्याही पटलावर खोटे ठरवता येऊ शकत नाहीत.'' असंही गफूर यांनी स्पष्ट केलं. विशेष म्हणजे, जाधव यांना वाचवण्यासाठी भारतीय नागरिक सैन्य दलाच्या अपीलीय न्यायालायत दाद मागू शकतात. तिथंही विरोधात निकाल लागल्यास, सैन्य प्रमुखाकडे दाद मागू शकतात. शिवाय सुप्रीम कोर्ट आणि राष्ट्रपती आदींकडेही अपील करु शकतात. पण पाक सैन्याच्या वतीने यासर्व ठिकाणी विरोध करण्यात येईल, असं गफूर यांनी सांगितलं. दरम्यान, काल सरकारी वकील उज्ज्वल निकम यांनीही कुलभूषण जाधव यांना काऊन्सलेर अॅक्सेस मिळावा, अशी मागणी केली होती. तसेच त्यांना देण्यात आलेल्या यातनांमध्ये त्यांचा मृत्यू झाला असल्याची शक्यता त्यांनी व्यक्त केली होती. संबंधित बातम्या