इराण कुणालाच सुट्टी देईना, ट्रम्पच्या चर्चेच्या दाव्यांची सुद्धा खिल्ली उडवली, पण फक्त 'या' एकाच देशावर मिसाईली, ड्रोन हल्ला अचानक का कमी केला? पडद्यामागून काय घडतंय?
Iran War Live Update: अमेरिकेच्या शस्त्रसंधीच्या दाव्याला प्रत्युत्तर देताना, इराणच्या लष्करी प्रवक्त्याने म्हटले की, अमेरिका प्रत्यक्षात स्वतःशीच वाटाघाटी करत आहे. तुमच्या पराभवाला तडजोड म्हणू नका.
Iran War Live Update: इराणने डोनाल्ड ट्रम्प यांच्या शस्त्रसंधीच्या प्रयत्नांची खिल्ली उडवली आहे. अमेरिकेच्या शस्त्रसंधीच्या दाव्याला प्रत्युत्तर देताना, इराणच्या लष्करी प्रवक्त्याने म्हटले की, अमेरिका प्रत्यक्षात स्वतःशीच वाटाघाटी करत आहे. इराणच्या लष्कराच्या खतम अल-अंबिया केंद्रीय मुख्यालयाचे प्रवक्ते लेफ्टनंट कर्नल इब्राहिम झोल्फघारी यांनी सरकारी टीव्हीवर प्रसारित झालेल्या एका रेकॉर्ड केलेल्या व्हिडिओमध्ये हे विधान केले. ते म्हणाले, "ज्या ताकदीबद्दल तुम्ही बोलत होता, तिचे आता अपयशात रूपांतर झाले आहे. तुम्ही स्वतःला जागतिक महासत्ता म्हणवता, पण जर तुमच्यात ही ताकद असती, तर तुम्ही आतापर्यंत या परिस्थितीतून बाहेर पडला असता. तुमच्या पराभवाला तडजोड म्हणू नका. तुमच्या पोकळ आश्वासनांचे युग संपले आहे."
इराणने कतारच्या हद्दीत हल्ला टाळला
दरम्यान, 'इन्स्टिट्यूट फॉर द स्टडी ऑफ वॉर' (ISW) च्या अहवालानुसार 18 मार्चपासून इराणने कतारच्या हद्दीत कोणताही क्षेपणास्त्र किंवा ड्रोन हल्ला केलेला नाही. 18 मार्च रोजी इराणने कतारच्या 'रास लाफान इंडस्ट्रियल सिटी'वर (Ras Laffan Industrial City) हल्ला करून कतारच्या 'लिक्विफाईड नॅचरल गॅस' (LNG) सुविधांचे मोठे नुकसान केले होते. (इस्रायलने इराणच्या साऊथ पार्स गॅस फील्डवर केलेल्या हल्ल्याचा बदला म्हणून इराणने हल्ला केला होता) यानंतर ट्रम्प यांनी 'ट्रूथ सोशल'वर (Truth Social) इराणला कडक इशारा दिला की, जर इराणने पुन्हा कतारवर हल्ला केला, तर अमेरिका इराणचे अत्यंत महत्त्वाचे 'साऊथ पार्स गॅस फील्ड' (South Pars Gas Field) पूर्णपणे उद्ध्वस्त करेल. ट्रम्प यांच्या याच इशाऱ्यामुळे इराणने कतारवरील हल्ले थांबवले असल्याची दाट शक्यता अहवालात वर्तवण्यात आली आहे.
21 मार्च रोजी इराणच्या सरकारी माध्यमांनी एक निवेदन जारी करून स्पष्ट केले की, कतारला धमकी देणारा जो 'IRGC' चा कथित ग्राफिक (graphic) समोर आला होता, तो पूर्णपणे खोटा आहे. कतार (आणि सौदी अरेबिया) वर हल्ले करणे टाळत असल्यामुळे, याची भरपाई करण्यासाठी इराणने आता आपला मोर्चा बहरीन, कुवेत आणि यूएई (UAE) यांसारख्या इतर आखाती देशांकडे वळवला असून तिथे ड्रोन आणि क्षेपणास्त्र हल्ल्यांचे प्रमाण वाढवले आहे.
बॅकडोअर डिप्लोमसी?
दुसरीकडे, पाकिस्तानचे पंतप्रधान शेहबाज शरीफ आणि कतार पडद्यामागून अमेरिका आणि इराणमध्ये मध्यस्थी करण्याचा प्रयत्न करत असल्याची चर्चा आहे. कतारने जरी अधिकृतपणे मध्यस्थी नाकारली असली, तरी अमेरिका आणि इराणमध्ये 'मेसेज' पोहोचवण्यासाठी कतारचा वापर केला जात आहे. काही वृत्तांनुसार, कतारमध्ये इराणचे $ 6 अब्ज (6 Billion Dollars) अडकून पडले आहेत. कतारने हे पैसे परत करण्यासाठी इराणसमोर 'हल्ले थांबवण्याची' अट घातल्याची चर्चा आहे. जरी कतारने याचा अधिकृतपणे इन्कार केला असला, तरी आर्थिक दबाव असू शकतो.
अमेरिकेचा शस्त्रसंधीचा प्रस्ताव इराणकडे सुपूर्द
दरम्यान, अल जझीराच्या सूत्रांनुसार, पाकिस्तानने अमेरिकेचा शस्त्रसंधीचा प्रस्ताव इराणकडे सुपूर्द केला आहे. या वृत्तानुसार, ट्रम्प प्रशासनाने पाकिस्तानला 15 कलमी दस्तऐवज दिला होता, जो इराणकडे सुपूर्द करण्यात आला आहे. आता प्रतिसादाची प्रतीक्षा आहे. अल जझीराचे पत्रकार उसामा बिन जावेद यांनी दिलेल्या वृत्तानुसार, वरिष्ठ पाकिस्तानी सूत्रांनी याला दुजोरा दिला आहे.
अमेरिकेच्या हालचालींवर लक्ष
दुसरीकडे, इराणचे संसद अध्यक्ष मोहम्मद बाकेर गालिबाफ म्हणाले की, तेहरान प्रदेशातील अमेरिकेच्या हालचालींवर, विशेषतः सैन्य तैनातीवर बारकाईने लक्ष ठेवून आहे. त्यांनी 'एक्स' या सोशल मीडिया प्लॅटफॉर्मवर लिहिले, "सेनापतींनी केलेल्या नुकसानीची भरपाई सैनिक करू शकत नाही. आमच्या हेतूंचा अंदाज लावण्याचा प्रयत्न करू नका." यापूर्वी, असोसिएटेड प्रेसने वृत्त दिले होते की, अमेरिकन लष्कराच्या 82व्या एअरबोर्न डिव्हिजनमधील 1 हजारहून अधिक सैनिकांना मध्य-पूर्वेत पाठवले जात आहे.
इतर महत्वाच्या बातम्या
Before You Go
Abhijeet Dipke Cockroach Janta Party PC : आता मी एकटा नाही, लाखो तरुण माझ्यासोबत : अभिजीत दीपके
महत्त्वाच्या बातम्या
