Iran Israel Conflict : अमेरिका-इस्त्रायलपुढे झुकणार नाही, त्यांना पश्चाताप होईल असं जबर आणि निर्णायक उत्तर देऊ; इराणचा इशारा
Iran Israel War Update : एकीकडे चर्चा सुरू असताना दुसरीकडे अमेरिका आणि इस्त्रायलने हल्ला केल्याचा आरोप इराणने केला. हे संयुक्त राष्ट्रांच्या नियमांच्या विरोधात असल्याचंही इराणने म्हटलंय.
मुंबई : पश्चिम आशियातील वाढत्या तणावाच्या पार्श्वभूमीवर इराण–इस्रायल संघर्ष अधिक तीव्र झाल्याचं दिसून येतंय. अमेरिका आणि इस्रायलच्या हल्ल्यानंतर इराणने कडक शब्दांत प्रतिक्रिया दिली आहे. या हल्ल्याचा अमेरिका आणि इस्त्रायलला पश्चाताप होईल असं उत्तर देऊ असं इराणने म्हटलंय. दरम्यान, अमेरिका आणि इस्त्रायलने केलेल्या या हल्ल्यानंतर संयुक्त राष्ट्रांनी (UN) तातडीने हस्तक्षेप करावं अशी मागणीही इराणने केली आहे.
प्रादेशिक अखंडतेचा भंग (Regional Integrity Violation)
इराणच्या परराष्ट्र मंत्रालयाने इस्रायलचा हल्ला हा देशाच्या राष्ट्रीय सार्वभौमत्वाचा आणि प्रादेशिक अखंडतेचा भंग असल्याचे म्हटलं आहे. एकीकडे चर्चा सुरू असताना दुसरीकडे अमेरिका आणि इस्रायलने हल्ला करत संयुक्त राष्ट्र सनदेतल्या कलम 2(4) चे उल्लंघन केल्याचा दावा इराणने केला. परकीय दबावापुढे आतापर्यंत कधीही झुकलो नाही आणि या वेळी त्याला निर्णायक आणि ठोस उत्तर देऊ असं इराणने म्हटलं आहे.
UN कडे इराणची मागणी (Iran Appeal to UN)
इस्रायलच्या प्रत्युत्तरात्मक कारवायांच्या पार्श्वभूमीवर इराणने संयुक्त राष्ट्रांकडे औपचारिक दाद मागितली आहे. या संघर्षात आंतरराष्ट्रीय समुदायाने हस्तक्षेप करून परिस्थिती नियंत्रणात आणावी, अशी मागणी तेहरानने केली आहे.
खामेनींचा फोटो समोर (Ayatollah Khamenei Appearance)
तणाव वाढल्यानंतर इराणचे सर्वोच्च नेते अयातुल्ला अली खामेनी भूमिगत झाल्याच्या चर्चा सुरू होत्या. मात्र, इराणने नॅशनल सुप्रीम सिक्युरिटी कौन्सिलच्या बैठकीतील त्यांचा फोटो जाहीर केला. यामुळे नेतृत्व सुरक्षित आणि सक्रिय असल्याचा संदेश इराणकडून देण्याचा प्रयत्न करण्यात आला.
नेतन्याहूंचा इशारा (Benjamin Netanyahu Statement)
इस्रायलचे पंतप्रधान बेंजामिन नेतन्याहू यांनी नागरिकांना उद्देशून दिलेल्या संदेशात इराणमधील 'दहशतवादी शासन संपवण्यासाठी' मोहीम सुरू केल्याचं सांगितलं. त्यांनी अमेरिकेचे माजी राष्ट्राध्यक्ष डोनाल्ड ट्रम्प यांच्या नेतृत्वाचे कौतुक केले. नेतन्याहूंच्या मते, इराणमधील अयातुल्ला शासनाने गेल्या अनेक दशकांत इस्रायल आणि अमेरिकेविरोधात कारवाया केल्या असून त्यांना अण्वस्त्रे मिळू देणे हे संपूर्ण मानवजातीसाठी धोकादायक ठरेल.
जागतिक युद्धाची भीती (Global War Risk)
इराण–इस्रायल संघर्ष वाढत गेल्यास पश्चिम आशियात मोठ्या प्रमाणावर युद्धजन्य परिस्थिती निर्माण होण्याची शक्यता व्यक्त केली जात आहे. अमेरिका, रशिया आणि चीनसारख्या महासत्तांची भूमिका निर्णायक ठरू शकते. भारतासारख्या देशांवरही याचे परिणाम तेलपुरवठा, व्यापार आणि सुरक्षा दृष्टीने होऊ शकतात.
ही बातमी वाचा:
महत्त्वाच्या बातम्या
