कोरोनाचा जगभरात पुन्हा हाहा:कार, फ्रान्समध्ये एका दिवसात सव्वा लाख बाधित, जाणून घ्या इतर देशांमधील परिस्थिती
Coronavirus updates : जगभरात कोरोना महासाथीचा आजार पुन्हा एकदा फैलावत आहे. फ्रान्ससह इतर देशांमध्ये कोरोनाबाधितांची संख्या वाढत आहे.
Coronavirus Updates in World : कोरोना महासाथीने जगभरात पुन्हा एकदा जोर पकडण्यास सुरुवात केली आहे. दक्षिण आफ्रिकेत आढळलेला कोरोनाचा व्हेरियंट ओमायक्रॉन जगातील अनेक देशांमध्ये फैलावला आहे. तर, ब्रिटन, फ्रान्स, इटलीमध्ये बाधितांची उच्चांकी नोंद होत आहे. फ्रान्समध्ये एकाच दिवसात जवळपास सव्वा लाख कोरोनाबाधित आढळल्याने प्रशासनाची चिंता वाढली आहे. फ्रान्स व इतर देशांमध्ये कोरोनाबाधितांची संख्या वाढत असली तरी मृतांची संख्या कमी असल्याने कोरोना झुंजणाऱ्या देशांना दिलासा मिळाला आहे.
फ्रान्समधील शहर मर्से रुग्णालयाचे प्रमुख डॉ. ज्युलियन कार्वेली यांनी म्हटले की, रुग्णालयात दाखल होणाऱ्यांमध्ये बहुतांशी जणांनी लस घेतली नाही. शनिवारी फ्रान्समध्ये एक लाख 4 हजार 611 कोरोनाबाधितांची नोंद करण्यात आली आहे. एकाच दिवसातील ही सर्वाधिक रुग्णसंख्या आहे. फ्रान्समध्ये 76 टक्के लोकांचे लसीकरण पूर्ण झाले आहे. फ्रान्स सरकारने ओमायक्रॉन व्हेरियंटच्या संभाव्य धोक्याला अधिक गंभीरपणे घेतले असून दोन डोस घेतलेले नागरीक तीन महिन्यानंतर बुस्टर घेऊ शकतात असे सरकारने म्हटले आहे.
इटलीत सलग तिसऱ्या दिवशी 50 हजार बाधितांची नोंद
इटलीमध्ये कोरोनाच्या नव्या व्हेरियंटमुळे चिंतेचे वातावरण आहे. सलग तिसऱ्या दिवशी कोरोनाच्या 50 हजारांहून अधिक बाधितांची नोंद करण्यात आली आहे. तर, 144 जणांचा मृत्यू झाला आहे. बाधितांची वाढती संख्या लक्षात घेता सरकारने देशभरात मास्कचा वापर अनिवार्य केला आहे.
ब्रिटनमध्ये सलग दुसऱ्या दिवशी एक लाखांहून अधिक बाधित
ब्रिटनमध्ये कोरोनाचा कहर दिसून येत आहे. सलग दुसऱ्या दिवशी एक लाखांहून अधिक कोरोनाबाधितांच्या प्रकरणांची नोंद करण्यात आली. बाधितांची संख्या वाढत असली तरी मृतांची संख्या अतिशय कमी आहे. ब्रिटनमधील लसीकरण केंद्रावर बुस्टर डोस घेणाऱ्यांच्या संख्येत वाढ झाली आहे. ब्रिटनमध्ये आतापर्यंत 50 लाख लोकांनी लस घेतली नाही.
अमेरिकेत कोरोनाबाधितांच्या संख्येत घट
शनिवारी कोरोनाच्या रुग्णांमध्ये लक्षणीय घट झाली. शनिवारी 58 हजार कोरोना रुग्णांची नोंद झाली. शुक्रवारी हा आकडा 1 लाख 84 हजारांवर पोहोचला होता. या दरम्यान 108 बाधितांचा मृत्यू झाला. 'सीडीसी'ने याबाबत बोलताना सांगितले की, अमेरिकेतील एकूण बाधितांपैकी सात टक्के प्रकरणे ही ओमायक्रॉनची आहेत. अमेरिकेत आतापर्यंत 8 लाख 37 हजार लोकांचा मृत्यू झाला आहे.
महत्त्वाच्या बातम्या
