MHADA Lottery 2025: खुशखबर! म्हाडा कोकण मंडळाची 5,285 घरांसाठी लॉटरी जाहीर, आजपासून अर्ज भरता येणार; जाणून घ्या A टू Z माहिती
MHADA Lottery 2025: म्हाडा कोकण मंडळाकडून पाच हजार घरांसाठी बंपर लॉटरी जाहीर करण्यात आली आहे. या लॉटरीसाठी आजपासून अर्ज भरण्याच्या प्रक्रियेला सुरुवात होणार आहे.
MHADA Lottery 2025: महाराष्ट्र गृहनिर्माण व क्षेत्रविकास प्राधिकरणाच्या (म्हाडा) कोकण गृहनिर्माण व क्षेत्रविकास मंडळातर्फे ठाणे शहर व जिल्हा तसेच वसई (जि. पालघर) येथील विविध गृहनिर्माण योजनांअंतर्गत एकूण 5,285 सदनिका, तसेच ओरोस (जि. सिंधुदुर्ग) आणि कुळगाव-बदलापूर येथील 77 भूखंड विक्रीसाठी सोडत जाहीर करण्यात आली आहे.
या सोडतीसाठी अर्ज नोंदणी व अर्ज भरण्याची प्रक्रिया आज सोमवारी दि. 14 जुलै 2025 रोजी दुपारी 1 वाजता, 'गो-लाइव्ह' कार्यक्रमाच्या माध्यमातून सुरू होणार आहे. या कार्यक्रमाचे उद्घाटन म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल (भा. प्र. से.) यांच्या हस्ते होणार आहे.
कोकण मंडळातर्फे जाहीर करण्यात आलेली ही सोडत एकूण पाच घटकांमध्ये विभागण्यात आली आहे.
1. 20 टक्के सर्वसमावेशक योजनेअंतर्गत – 565 सदनिका
2. 15 टक्के एकात्मिक शहर गृहनिर्माण योजनेअंतर्गत – 3,002 सदनिका
3. म्हाडा कोकण मंडळ गृहनिर्माण योजना (व विखुरलेल्या सदनिका) – सद्यस्थितीत उपलब्ध अशा 1,677 सदनिका
4. म्हाडा कोकण मंडळ गृहनिर्माण योजना (50 टक्के परवडणाऱ्या सदनिका) – 41 सदनिका
5. म्हाडा कोकण मंडळ अंतर्गत भूखंड विक्री – 77 भूखंड
या सोडतीसाठी ऑनलाइन अर्ज भरण्याची अंतिम मुदत 13 ऑगस्ट 2025 रोजी रात्री 11.59 वाजेपर्यंत आहे. अर्जदार 14 ऑगस्ट 2025 रोजी रात्री 11.59 वाजेपर्यंत अनामत रक्कम ऑनलाईन भरू शकतील. सर्व आवश्यक कागदपत्रांची पूर्तता करणारे अर्ज या प्रणालीद्वारे तपासले जातील आणि पात्र अर्जांची प्रारूप यादी 21 ऑगस्ट 2025 रोजी सायंकाळी 6.00 वाजता म्हाडाच्या अधिकृत संकेतस्थळावर https://housing.mhada.gov.in प्रसिद्ध केली जाणार आहे. प्रारूप यादीवरील दावे व हरकती नोंदविण्याची अंतिम तारीख 25 ऑगस्ट 2025 रोजी सायंकाळी 6.00 वाजेपर्यंत आहे. त्यानंतर, सोडतीसाठी पात्र अर्जांची अंतिम यादी 1 सप्टेंबर 2025 रोजी सायंकाळी 6.00 वाजता संकेतस्थळावर प्रसिद्ध करण्यात येईल.
दरम्यान, 3 सप्टेंबर 2025 रोजी सकाळी 10 वाजता, पात्र अर्जांची संगणकीय सोडत ठाणे येथील डॉ. काशीनाथ घाणेकर नाट्यगृहात जाहीर करण्यात येणार आहे. सोडतीचा निकाल अर्जदारांना तत्काळ मोबाईलवर SMS, ई-मेल तसेच मोबाईल अॅपद्वारे प्राप्त होईल. कोकण मंडळाच्या संगणकीय सोडतीमध्ये IHLMS 2.0 या संगणकीय प्रणाली आणि अॅपच्या माध्यमातून अर्ज नोंदणी प्रक्रिया सोमवार, 14 जुलै 2025 रोजी दुपारी 1.00 वाजता सुरू होणार आहे. सोडतीमध्ये सहभागी होण्यासाठी अर्जदारांना IHLMS 2.0 ही संगणकीय प्रणाली Android किंवा iOS या दोन्ही ऑपरेटिंग सिस्टिमसाठी मोबाईलवरून डाउनलोड करता येईल.
अर्जदारांच्या सोयीसाठी म्हाडाच्या अधिकृत संकेतस्थळावर https://housing.mhada.gov.in अर्ज नोंदणी प्रक्रिया उपलब्ध करून देण्यात आली आहे. नवीन संगणकीय प्रणालीचा वापर सोपा व्हावा यासाठी मार्गदर्शक माहितीपुस्तिका, ध्वनीचित्रफीत, हेल्प फाईल आणि हेल्प साईट याच संकेतस्थळावर उपलब्ध करून देण्यात आले आहेत. सोडत प्रक्रियेत सहभागी होण्यापूर्वी अर्जदारांनी ही मार्गदर्शक माहिती काळजीपूर्वक वाचावी, असे आवाहन कोकण मंडळाच्या मुख्य अधिकारी रेवती गायकर यांनी केले आहे.
आणखी वाचा
महत्त्वाच्या बातम्या
