मुंबईत मराठी-हिंदी वाद; मुंब्रा बंद करुन टाकेन म्हणणाऱ्या तरुणाला जमावाने मागायला लावली माफी

फळविक्रेताला मराठी का येत नाही विचारले म्हणून जमावाने तरुणाला कान पकडून माफी मागायला लावल्याची घटना उघडकीस आली आहे.

Mumbra youth marathi hindi video viral

Source : abp

ठाणे : महाराष्ट्रात राहून मराठीला विरोध करण्याच्या घटना सातत्याने घडताना दिसून येत आहेत. विशेषत: राजधानी मुंबईतच (Mumbai) या गोष्टीचा प्रत्यय येतो. काही दिवसांपूर्वी कल्याणमध्ये एका शुक्लानामक अधिकाऱ्याने मराठी कुटुंबाला गुंडांकरवी मारहाण केल्याची घटना घडली होती. या घटनेनंतर राज्यातील राजकीय नेत्यांनी सरकारला धारेवर धरल्याचं दिसून आलं, तर विधिमंडळ अधिवेशनातही हा मुद्दा चर्चेला आला होता. त्यानंतर, संबंधित अधिकाऱ्याला पोलिसांनी (Police) अटक करुन चौकशीही केली. आता, पुन्हा एकदा मराठी व अमराठी असा वाद समोर आला आहे. ठाणे जिल्ह्यातील मुंब्रा येथे एका मराठी (Marathi) तरुणाला जमलेल्या जमावाने दमदाटी करत माफी मागायला भाग पडल्याचं पाहायला मिळत आहे. या घटनेचा व्हिडिओ सोशल मीडियात व्हायरल झाला असून संबंधित युवक दोन्ही कानांना हात धरुन जमावाची माफी मागत असल्याचे व्हिडिओत दिसून येते. तसेच, मी केवळ फळविक्रेत्याला मराठीत बोल असा आग्रह केल्याचंही तो वारंवार सांगताना दिसून येतो.  

फळविक्रेताला मराठी का येत नाही विचारले म्हणून जमावाने तरुणाला कान पकडून माफी मागायला लावल्याची घटना उघडकीस आली आहे. विशेष म्हणजे याप्रकरणी ⁠मराठी तरुणावरच मुंब्रा पोलिसांनी गुन्हा दाखल केला असून ⁠या मराठी युवकास मुंब्रा येथील जमावाने शिवीगाळ केली आहे. मुंब्रा येथे मराठी-हिंदी वाद झाल्याचे दिसून येते. ⁠एक मराठी तरुण मुंब्र्यातील एका भाजी विक्रेत्याकडून फळ घेत असताना हा वाद झाल्याची माहिती आहे. ⁠फळविक्रेत्याकडून फळे घेत असताना मराठी तरुणाने फळ विक्रेत्याला मराठीत बोलण्यास सांगितले. मात्र, फळविक्रेत्याने मराठी येत नसल्याचे सांगत्यावरुन दोघांमध्ये हा वाद झाला.  

⁠मला मराठी येत नाही मी हिंदीत बोलणार असं फळ विक्रेता बोलताच मराठी तरुण “महाराष्ट्रात रहायचे असेल तर मराठी आलेच पाहिजे, मी मुंब्रा बंद करुन टाकेन” असं बोलू लागला. मराठी तरुणाच्या या वाक्यावरुन इतर फळविक्रेतेही तिथे आले व वाद आणखी चिघळला. इतर फळ विक्रेत्यांसह स्थानिक रहिवाशांनी देखील घटनास्थळी धाव घेत वाद जाणून मराठी युवकास घेरले. तसेच, मुंब्र्यात मराठी-हिंदी वाद का करतो, मुंब्रा शांत आहे, शांत राहू दे असं मुंब्र्याती स्थानिक बोलू लागले. त्यानंतर, गर्दी वाढल्याने वाद चिघळला आणि लोकांनी त्या मराठी तरुणाला मुंब्रा पोलीस स्टेशन येथे नेऊन त्यावरच गुन्हा दाखल केला. 

युवकाला पोलिसांच्या ताब्यात दिले

आम्हाला मराठी येत नाही, काय करायचे ते कर असं गर्दीतले लोकं बोलत होते, ही ⁠घटना मोबाईल कॅमेऱ्यात कैद झाली आहे. ⁠हिंदी येते तर हिंदीत बोल, वाद कशाला करतो असं बोलून मराठी तरुणाला पोलीस स्टेशनला नेण्यात आले. ⁠विशाल गवळी असे तरुणाचे नाव असून त्याला आईने फळं आणायला पाठवले होते. दरम्यान, या घटनेचा व्हिडिओ समाजमाध्यमातून व्हायरल होत असून नेटीझन्स आपल्या कमेंट करत आहेत.

हेही वाचा