कार्तिकी सोहळ्यासाठी पंढरीत 24 तास विठ्ठल दर्शन सुरू; महानैवेद्य योजनेत सहभागी होता येणार

आषाढी व कार्तिकी यात्रा कालावधीत देवाची निद्रा बंद होत असल्याने परंपरेप्रमाणे देवाचा पलंग उद्या काढला जाणार आहे.

24 hours Vitthal darshan starts in Pandharpur kartiki

Source : abp

सोलापूर : आषाढी-कार्तिकी भक्तगण येती... म्हणत पंढरीच्या (Pandharpur) पांडरायाचे गोडवे गायले जातात. त्यामुळे, आषाढीच्या वारीनंतर भाविकांना उत्सुकता असते ती कार्तिकी एकादशीची. कार्तिकी सोहळ्याला येणाऱ्या हजारो भाविकांना अखंड देवाच्या दर्शनाचा लाभ व्हावा यासाठी उद्या देवाचा पलंग निघणार असून उद्यापासून देवाचे 24 तास दर्शन सुरू राहणार असल्याची माहिती मंदिर समितीचे कार्यकारी अधिकारी राजेंद्र शेळके यांनी दिली. आषाढी व कार्तिकी या दोन यात्रांसाठी राज्यभरातून लाखो भावी विठ्ठल दर्शनासाठी येत असतात. या यात्रा कालावधीत जास्तीत जास्त भाविकांना विठुरायाचे दर्शन व्हावे यासाठी उद्यापासून देव 24 तास दर्शनासाठी उपलब्ध राहणार आहे. उद्यापासून कार्तिकी यात्रा संपेपर्यंत विठ्ठल मंदिर 24 तास भाविकांसाठी खुले असणार आहे. 

यासाठी आषाढी व कार्तिकी यात्रा कालावधीत देवाची निद्रा बंद होत असल्याने परंपरेप्रमाणे देवाचा पलंग उद्या काढला जाणार आहे. याचाच अर्थ भक्तांसाठी विठुराया उद्यापासून  24 तास मंदिरात उभा असणार आहे . चांगला मुहुर्त व दिवस पाहून श्रींचा पलंग काढण्याची परंपरा आहे.  यावर्षी कार्तिकी साठी उद्या दिनांक 04 नोव्हेंबर रोजी चांगला दिवस असल्याने विधिवत पुजा करून सकाळी 7.30 वाजता श्रींचा पलंग काढण्यात येणार आहे. अखंड दर्शनासाठी उभा राहणाऱ्या विठुरायाला थकवा जाणू नये म्हणून देवाच्या मूर्तीच्या पाठीशी मऊ कापसाचा लोड तर रुक्मिणी मातेच्या मूर्तीच्या पाठीशी मऊ कापसाचा तक्क्या देण्यात येणार आहे. त्यामुळे श्री विठ्ठल रुक्मिणीमातेचे 24 तास मुखदर्शन, तर नित्य पूजा, नैवेद्य ,पोशाख आणि लिंबू पाणी या विधी व्यतिरिक्त जवळपास देव सव्वा बावीस तास भाविकांना दर्शनासाठी उपलब्ध असणार आहे . श्रींचा पलंग काढण्यात आल्यानंतर काकडा आरती, पोशाख, धुपारती, शेजारती इ. राजोपचार बंद होवून नित्यपुजा, महानैवेद्य व गंधाक्षता हे राजोपचार सुरू राहतील. कार्तिकी यात्रेनंतर देवाची प्रक्षाळ पूजा दिनांक 20 नोव्हेंबर होणार असून यानंतर देवाचे 24 तास दर्शन व्यवस्था बंद होईल.      

श्री विठ्ठल रूक्मिणीमातेस महानैवेद्य समर्पित करण्यासाठी रू.7,000/- देणगी देऊन महानैवेद्य सहभाग योजनेत सहभागी होता येते. त्याची दिनांक 01 जानेवारी, 2025 ते 31 डिसेंबर, 2025 या कालावधीतील नोंदणी देखील सुरू करण्यात आली असल्याचे कार्यकारी अधिकारी राजेंद्र शेळके यांनी सांगितले.  त्याबाबतच्या अधिक माहितीसाठी मंदिर समितीच्या 02186 224466 व 223550 या क्रमांकावर व श्री संत तुकाराम भवन,  पंढरपूर येथील देणगी कार्यालयात संपर्क साधावा असे आवाहन मंदिर समितीच्या वतीने कार्यकारी अधिकारी राजेंद्र शेळके यांनी केले आहे.

हेही वाचा