जिथं दोन हेलिपॅड आहेत तिथं रस्ते, ब्रिज, रूग्णालयं आणि शाळा नाहीत ही परिस्थिती लवकरच बदलेल ही अपेक्षा : हायकोर्ट
शाळेत जाण्यासाठी सातारा जिल्हातील काही मुली स्वतः होडी वल्हवून कोयना धरण पार करत असल्याची गोष्ट समोर येताच मुंबई उच्च न्यायालयानं त्याची गंभीर दखल घेतली आहे.
मुंबई : नवे मुख्यमंत्री ज्या भागातून येतात तिथं विद्यार्थ्यांना येणा-या समस्यांकडे आता जास्त गंभीरतेनं पाहिलं जाईल, अशी अपेक्षा हायकोर्टानं व्यक्त केली आहे. त्यामुळे जिथं दोन हेलिपॅड आहेत तिथं आजही चांगले रस्ते, रूग्णालय आणि शाळा नाहीत ही अवस्था आता सुधारेल कारण मुख्यमंत्र्यांना या भागाची जास्त माहिती आहे, असं मत व्यक्त करत यासंदर्भातील सुमोटो याचिकेवर सुनावणी घेताना हायकोर्टानं मुख्य सचिवांना संबंधित विभागीय अधिका-यांची बैठक घेऊन उपपाययोजना सुरू करण्याचे निर्देश दिले आहेत. ही गोष्ट समोर येताच तत्कालीन नगरविकास मंत्री आणि सध्याचे मुख्यमंत्री एकनाथ शिंदे यांचे खासदार सुपूत्र श्रीकांत शिंदे यांनी या मुलींकरता तात्काळ बोट उपलब्ध करून दिली होती.
शाळेत जाण्यासाठी सातारा जिल्हातील काही मुली स्वतः होडी वल्हवून कोयना धरण पार करत असल्याची गोष्ट समोर येताच मुंबई उच्च न्यायालयानं त्याची गंभीर दखल घेतली आहे. राज्यातील काही भागांत मुलींना शिक्षण घेण्यासाठी प्रयत्नांची पराकाष्ठा करावी असून ही अत्यंत लाजिरवाणी बाब आहे. मात्र, या परिस्थितीत निराश न होता या मुलींची शिक्षण घेण्याची तीव्र इच्छा खरोखरच कौतुकास्पद आहे. अशा शब्दांत हायकोर्टानं या मुलींच्या शिक्षणासाठीच्या ध्येयाला सलाम ठोकत याबाबत सु-मोटो याचिका दाखल करण्याचे निर्देश हायकोर्ट रजिस्ट्रारला दिले होते. 'बेटी बचाव बेटी पढाओ' या घोषणेचे उद्देश साध्य करायचा असेल तर राज्य सरकारनं मुलींना शिक्षणासाठी योग्य वातावरण देण्याची गरज आहे. जेणेकरून या मुलींना सुरक्षितपणे शाळेत जाण्या-येण्यासाठी सोईसुविधा उपलब्ध होतील.
काय आहे प्रकरण?
सातारा जिल्हा हा एक प्रगतीशील जिल्हा म्हणून ओळखला जातो. मात्र, याच जिल्ह्यातील दुर्गम भागातील विद्यार्थ्यांना आजही शिक्षणासाठी जीव धोक्यात घालून प्रवास करावा लागतोय. जावली तालुक्यात खिरखंडी या गावातील मुलींना शाळेत पोहोचण्यासाठी आधी जंगलातून आणि त्यानंतर स्वत:च होडी चालवून कोयना धरणाचा विशाल जलाशय पार करून पलिकडच्या शाळेत जावं लागत आहे. जावली तालुक्यातील व्याघ्र प्रकल्पात खिरखंडी गावाचा समावेश होतो. या भागांत सकाळी 9 वाजता शाळा सुरू होते. त्यासाठी सकाळी 8 वाजता गावातील मुली शाळेला जायला निघतात. त्यांचा हा प्रवास होडीनं सुरू होतो. सुमारे अर्धा तास वेगानं वाहणार्या वार्याचा सामना करत या मुली होडी चालवत कोयनेच्या दुसर्या तीरावर जातात. तिथे होडी थांबवून पुढे सुमारे 4 किलोमीटर काट्याकुट्यांतून आणि किर्र जंगलातून पायपीट करत दीड तासानंतर 'अंधारी' या गावात त्यांची शाळा आहे. याबाबतचं वृत्त प्रसिध्द होताच हायकोर्टानं त्याची दखल घेतली होती. न्यायमूर्ती प्रसन्न वराळे आणि न्यायमूर्ती श्रीकांत कुलकर्णी यांच्या खंडपीठासमोर या सु-मोटो याचिकेवर सुनावणी सुरू आहे.
CM Eknath Shinde on Satara Roads : साताऱ्यातील ग्रामीण भागात लवकरच सर्व सुविधा
महत्त्वाच्या बातम्या
