Vishal Patil: 'पुढील निवडणुकीत खासदार असणार की माहीत नाही कारण..' विशाल पाटील अचानक असं का म्हणाले?

सांगलीत आणखी एका गावाचे नाव बदलण्यात आले. या नामकरण सोहळ्यात खासदार विशाल पाटील बोलत होते. यावेळी व्यासपीठावर शिंदे सेनेचे आमदार सुहास बाबर, काँग्रेसचे मनपा नगरसेवक हर्षवर्धन पाटील उपस्थित होते.

Vishal Patil

Source : ABP Majha

Vishal Patil: सार्वजनिक कार्यक्रमात आता महिलांची संख्या वाढत आहे. आता 33 टक्के म्हणजेच एक तृतीयांश महिला प्रतिनिधित्व करणार आहेत. आता आमदार, खासदार देखील महिला होणार आहेत. त्यामुळे पुढच्या वेळेस आम्ही खासदार असेल की नाही याची खात्री नसल्याची चिंता सांगलीचे खासदार विशाल पाटील यांनी व्यक्त केली. सांगली जिल्ह्यात आणखी एका गावाचे नाव बदलण्यात आले. या नामकरण सोहळ्यात खासदार विशाल पाटील बोलत होते. यावेळी व्यासपीठावर शिंदे सेनेचे आमदार सुहास बाबर, काँग्रेसचे मनपा नगरसेवक हर्षवर्धन पाटील उपस्थित होते. सांगली जिल्ह्यातील खानापूर तालुक्यातील मौजे मेंगाणवाडीचे नाव बदलून मौजे शिवशिवापूर असे करण्यात आले. हे नामकरण केवळ नावातील बदल नसून गावाच्या ओळखीला, परंपरेला आणि संस्कृतीला नव्याने दिशा देणारा एक ऐतिहासिक क्षण ठरला असल्याचे विशाल पाटील म्हणाले. 

पुढील वेळी आम्ही असेल की नाही याची खात्री नाही

विशाल पाटील पुढे म्हणाले, कार्यक्रमात आता महिला दिसत आहेत. एवढ्या संख्येने महिला फक्त देवाच्या कार्यक्रमाला येतात. गावच्या नामकरणाच्या कार्यक्रमात पुरुषांपेक्षा महिलांचा सहभाग जास्त आहे. त्यामुळे पुरुषांपेक्षा महिलांना आनंद नामकरणाचा जास्त झाला आहे. आता 33 टक्के एक तृतीयांश महिला प्रतिनिधित्व करणार आहेत. आता आमदार, खासदार देखील महिला होणार आहेत. पुढच्या वेळेस आम्ही असेल की नाही याची खात्री नाही. मतदारसंघ मोठा आहे. त्यामुळे प्रत्येक गावात जाणे शक्य होत नाही. सहा महिने इथे राहून एक जरी गाव केलं तर 750 गाव पाच वर्षात होत नाहीत. मी दिल्लीत होतो, विश्वजीत कदमांच्या हेलिकॉप्टरमधून कार्यक्रमाला आलो. पुढील लोकसभेचा प्रचार या कार्यक्रमातून आताच करतो असे त्यांनी सांगताच उपस्थित ग्रामस्थांमध्ये एकच हशा पिकला.

विशाल पाटील पहिल्यांदाच खासदार 

दरम्यान, 2024 मध्ये पार पडलेल्या लोकसभा निवडणुकीत महाविकास आघाडीत सांगली लोकसभेच्या जागेवरून वादाची ठिणगी पडली होती. जागावाटपात शिवसेना ठाकरे गट आणि काँग्रेसमधील संघर्ष टोकाला पोहोचला होता. विशाल पाटील यांच्यासाठी आमदार विश्वजित कदम यांनी प्रतिष्ठा पणाला लावली होती. तर ठाकरे यांनीही कोणत्याही प्रकारे ताकद नसतानाही ताकद लावत चंद्रहार पाटील यांना उमेदवारी दिली होती. मात्र, विशाल पाटील यांनी अपक्ष निवडणुकीत उतरत चंद्रहार पाटील यांना एकतर्फी मात दिली होती. विशाल पाटील यांना वंचितने पाठिंबा दिला होता. प्रकाश आंबेडकर यांनी त्यांच्यासाठी प्रचार केला होता. निवडून आल्यानंतर विशाल पाटील यांनी काँग्रेसलाच पाठिंबा दिला होता. 

इतर महत्वाच्या बातम्या