Sangli News: जत पंचायत समितीतील कनिष्ठ अभियंत्याच्या प्रकरणाची सखोल चौकशी करा; आमदार गोपीचंद पडळकरांची मागणी
अवधूत अशोक वडार (वय 27) असे मयत तरुणाचे नाव असून हा तरुण जत पंचायत समितीच्या बांधकाम उपविभागामध्ये कनिष्ठ अभियंता म्हणून नोकरीस होता.
Sangli News: जत पंचायत समितीमधील कनिष्ठ अभियंता अवधूत वडारची आत्महत्या दुर्दैवी असल्याचे भाजप आमदार गोपीचंद पडळकर यांनी म्हटलं आहे. पोलिसांनी या घटनेचा सखोल तपास करावा अशी मागणी पडळकर यांनी केली आहे. या आत्महत्येमागे राजकीय दबाव होता अशी कुटुंबाला शंका असेल तर चौकशी पोलिसांनी करावी, अशी विनंती पडळकर यांनी पोलिसांना केली. जर कोणी या आत्महत्येस कारणीभूत असेल तर त्यांच्यावर कारवाई करावी असे आमदार पडळकर यांनी म्हटलं आहे. गोपीचंद पडळकर म्हणाले की, अवधूत वडार हे ज्युनिअर होते. खूप चांगला मुलगा होता. मी माहिती घेतली, भेट झाली नव्हती. परंतु, ही घटना झाल्यानंतर गटविकास अधिकाऱ्यांशी फोनवरून बोललो. त्यांचे सहकाऱ्यांशी चर्चा केली. अत्यंत मनमिळाऊ मुलगा होता. परंतु, त्यांना काही त्रास झाला असेल तर त्यांच्यावर दबाव असेल, तर चौकशी करावी आणि जो कोणी या आत्महत्येस कारणीभूत असेल तर त्यांच्यावर कारवाई करावी, असे ते म्हणाले.
पोलिसांनी चौकशी करावी
एखाद्या गावामध्ये आमदार फंड दिला तर त्याचे अंदाजपत्रक करा आणि वर पाठवा. कनिष्ठ अभियंत्यावर दबाव टाकण्यासारखी वेळच नाही येत नाही. कुठलाही विधानसभा मतदारसंघाचा आमदार असतील तर हीच परिस्थिती असेल, म्हणून आत्महत्येमागे काही राजकीय दबाव असेल, शंका असतील तर नक्कीच त्या सगळ्या विषयाची चौकशी पोलिसांनी करावी अशी विनंती आहे, असे पडळकर म्हणाले.
राजकीय हस्तक्षेप करत दबाव टाकला
दरम्यान, सांगलीत (Sangli) कृष्णा नदी पात्रात मृतदेह तरंगताना आढळून आल्याने जिल्ह्यात खळबळ उडाली होती. अवधूत अशोक वडार (वय 27) असे मयत तरुणाचे नाव असून हा तरुण जत पंचायत समितीच्या बांधकाम उपविभागामध्ये कनिष्ठ अभियंता म्हणून नोकरीस होता. मात्र, सरकारी कामात राजकीय हस्तक्षेप करत दबाव टाकण्यात आल्याने अवधूतने हे टोकाचं पाऊल उचलल्याचा आरोप त्याच्या कुटुंबीयांकडून करण्यात आला. करणी, पोलिसांकडून अधिक तपास सुरू आहे, मात्र हा घातपात असल्याची शंका अवधूतच्या कुटुंबीयांनी व्यक्त केली आहे. गेल्या सहा महिन्यांपासून जतमधील महिला माजी जिल्हा परिषद सदस्यांचा पती असलेले सुनील पवार, आमदाराचा पीए म्हणवणारा एकजण आणि जतच्या पंचायत समितीमधील इतर कर्मचाऱ्यांकडून अवधूतवर शासकीय कामात दबाव टाकला जात होता, असा आरोप अवधुतच्या कुटुंबाने केला. गेल्या काही दिवसांपासून तणावात होता, तसेच त्याचे मानसिक संतुलन देखील बिघडले होते असा आरोप अवधूतच्या चुलत्याने केला. याच कारणातून अवधूतने एकतर आत्महत्या केली असावी किंवा त्याचा घातपात झाला असावा असाही संशय कुटुंबांनी व्यक्त केला आहे.
इतर महत्वाच्या बातम्या
महत्त्वाच्या बातम्या
