Amol Kolhe On Adhalrao Patil : माझी शेवटची निवडणूक, या वक्तव्यानंतर आढळराव- कोल्हेंमध्ये जुंपली!
माझी यंदाची ही शेवटची निवडणूक आहे, असं भावनिक आवाहन शिरूरमधील अजित पवार गटाचे उमेदवार शिवाजी आढळरावांनी केलं. त्यावर अमोल कोल्हेंनी प्रतिक्रिया दिली आहे.
शिरुर, पुणे : माझी यंदाची ही शेवटची निवडणूक आहे, असं भावनिक आवाहन शिरूरमधील अजित पवार (Ajit Pawar) गटाचे उमेदवार शिवाजी आढळरावांनी (Adhalrao patil ) केलं. पण देशाची निवडणूक असताना आढळरावांनी हे मनोरंजक वक्तव्य केलं, यातून त्यांचा मी पणा अधोरेखित झाला, अशी खोचक टीका त्यांचे विरोधक खासदार अमोल कोल्हेंनी केली. मी राजकारणातून निवृत्त होऊ नये, अशी कोल्हेची इच्छा असेल आणि ते भावनिक झाले असतील तर पुन्हा लढेन, असं म्हणत आढळरावांनी कोल्हेंची (Amol Kolhe) खिल्ली उडवली.
शिरुर लोकसभा मतदारसंघात महाविकास आघाडीचे उमेदवार अमोल कोल्हे आणि महायुतीचे उमेदवार आढळराव पाटील हे कायम एकमेकांवर टीका करताना दिसतात. एकमेकांच्या विकास कामांवर प्रश्न चिन्ह उपस्थित करत असतात. कधी कांद्याच्या प्रश्नावरुन टीका केली जाते तर कधी शेतकऱ्यांच्या हमीभावावरुन टीका केली जाते. मात्र आता प्रचारादरम्यान भावनिक साद घालण्याचा प्रयत्नदेखील सुरु असल्याचं दिसत आहे.
आढळराव पाटील हे स्वत:चं मनोधैर्य वाढवण्याचं काम करत आहेत. सुरुवातीला ते म्हणाले की 2019 चा बदला घ्यायचा आहे आणि आता ते थेट शेवटची निवडणूक असल्याचं आढळराव पाटील म्हणत आहे. यातून आढळराव पाटलांचा मी पणा दिसून येत आहे. देशासाठी, देशाच्या कल्याणासाठी आणि देशातील प्रश्नांसाठी त्यांना काम करायचं नाही. देशात बेरोजगारीचा प्रश्न आहे. शेतकऱ्यांच्या समस्या आहेत. त्यावर न बोलता थेट माझी शेवटची निवडणूक असल्याचं म्हणून ते लोकांना भावनिक साद घालण्याचा प्रयत्न करत आहेत. मात्र लोकांना आता ही भावनिक साद महत्वाची नाही त्यांना प्रश्न सोडवणारा नेता हवा आहे, असं अमोल कोल्हे म्हणाले.
आढळराव पाटलांनी अमोल कोल्हेंच्या विधानाची चांगलीच खिल्ली उडवली आहे. अमोल कोल्हे काय विधान करतात आणि त्याला काय उत्तर द्यायचं हा माझा वैयक्तिक प्रश्न आहे. मात्र जर त्यांची इच्छा असेल की मी अजून चार निवडणुका लढवाव्या तर मी अजून लढेन. एवढे वर्ष मी काम केलं आता दुसऱ्याला संधी द्यावी असं मला वाटत आहे मात्र जर माझी शेवटची निवडणुकीचं ऐकून अमोल कोल्हे भावनिक झाले असतील तर मी निवडणूक लढेन, असं आढळराव पाटलांनी स्पष्ट केलं आहे.
इतर महत्वाची बातमी-
महत्त्वाच्या बातम्या
