Raj Thackeray: इतके दिवस काय केलं, पद सोडून द्या, काम न करणाऱ्यांना काढून टाका; पुण्यात राज ठाकरेंचा पदाधिकाऱ्यांना सज्जड दम
Raj Thackeray: मनसे अध्यक्ष राज ठाकरे यांच्या नेतृत्वात आज पुण्यातील शाखाध्यक्षांची बैठक आयोजित करण्यात आली होती. या बैठकीत राज ठाकरेंनी शाखाध्यक्ष आणि पदाधिकाऱ्यांची कानउघडणी केली.
Raj Thackeray: महाराष्ट्र नवनिर्माण सेनेचे (MNS) अध्यक्ष राज ठाकरे (Raj Thackeray) यांनी आज पुण्यातील शाखाध्यक्ष आणि पदाधिकाऱ्यांच्या बैठकीत पक्षातील निष्क्रियतेवर जोरदार संताप व्यक्त केला. “काम करायची इच्छा नसेल तर पद सोडा... इतके दिवस काय केलं दाखवा... आणि जे काम करत नाहीत त्यांना थेट काढून टाका,” या शब्दांत राज ठाकरे यांनी पक्षातील पदाधिकाऱ्यांना चांगलाच सज्जड दम दिला.
पुण्यातील संकल्प हॉलमध्ये झालेल्या या बैठकीला शहरातील सर्व शाखाध्यक्ष आणि पदाधिकारी उपस्थित होते. या बैठकीत राज ठाकरे स्वतः पक्षाच्या संघटनात्मक कामावर आणि आगामी स्थानिक स्वराज्य संस्थांच्या निवडणुकांवर मार्गदर्शन करण्यासाठी आले होते. बैठकीत सुरुवातीलाच राज ठाकरेंनी एका वरिष्ठ पदाधिकाऱ्याला त्यांच्या सोशल मीडियावरील पोस्टवरून फटकारले.
Raj Thackeray: एकाच ठिकाणी कुठे तरी राहा
‘मुळशी पॅटर्न’ फेम रमेश उर्फ पिट्या परदेशी, हे मनसे चित्रपट सेनेचे उपाध्यक्ष आणि शाखाध्यक्ष आहे. त्यांनी काही दिवसांपूर्वी राष्ट्रीय स्वयंसेवक संघाच्या (RSS) संचलनाचा फोटो सोशल मीडियावर पोस्ट केला होता. हा फोटो पाहून राज ठाकरे चांगलेच संतापले. त्यांनी थेट विचारलं की, “छाती ठोकपणे सांगत होता मी संघाचा कार्यकर्ता आहे, कशाला टाईमपास करतो. एकाच ठिकाणी कुठे तरी राहा, असे म्हणत राज ठाकरेंनी रमेश परदेशी यांना झापले.
Raj Thackeray: काम न करणाऱ्यांना काढून टाका
तसेच राज ठाकरे यांनी पदाधिकाऱ्यांना सज्जड दम दिला. काम करायची इच्छा नसेल तर पद सोडा, असे म्हणत राज ठाकरे यांनी शाखा अध्यक्षांना फटकारले. इतके दिवस काय काम केले हे दाखवा, मतदार याद्या पूर्ण का केल्या नाही? असा प्रश्न राज ठाकरेंनी पदाधिकाऱ्यांना विचारला. तर ज्यांनी काम केले नाही त्यांना काढून टाकण्याचे आदेश देखील राज ठाकरेंनी दिले. या फटकारणीनंतर सभागृहातील अनेक शाखाध्यक्ष आणि पदाधिकारी गप्प बसले, काहींनी तर माना खाली घातल्याचे पाहायला मिळाले.
MNS Pune Meeting: बैठक अर्धवट संपली
दरम्यान, शाखाध्यक्षांची ही बैठक साधारणपणे एक ते दोन तास चालेल, अशी अपेक्षा होती. या बैठकीचा मुख्य उद्देश म्हणजे पुणे शहरातील विविध स्थानिक प्रश्नांवर, आगामी स्थानिक स्वराज्य संस्थांच्या निवडणुकांवरील रणनीतीवर, तसेच मतदार यादीतील गोंधळावर सविस्तर चर्चा करून आवश्यक मार्गदर्शन करणे हा होता. मात्र, शहरातील नेते आणि पदाधिकाऱ्यांकडून समाधानकारक व अपेक्षित उत्तरं न मिळाल्याने, राज ठाकरे यांनी नाराजी व्यक्त करत बैठक अल्पावधीतच संपवून निघून जाण्याचा निर्णय घेतला.
आणखी वाचा
महत्त्वाच्या बातम्या
