Pune News LIVE Updates : पुणे आणि परिसरातील महत्त्वाच्या बातम्यांचा आढावा फक्त एका क्लिकवर...

Pune News LIVE Updates : पुणे आणि परिसरातील सामाजिक, आर्थिक, शैक्षणिक, क्रिडा, राजकीय क्षेत्रातील महत्त्वाच्या बातम्यांचा आढावा फक्त एका क्लिकवर...

Background

तेव्हा राज्यातील भाजप कुठे होतं?, आमदार रोहित पवारांचा सवाल
गेल्या 6 वर्षात तिप्पट दर आधीच्या सरकारने पेट्रोल डिझेलवर लावले आहेत. आतापर्यंत अतिरिक्त 8 लाख कोटी गोळा केले तेव्हा राज्यातील भाजप कुठे होतं? लोकसभेच्या पोटनिवडणुका होतात तेव्हा दर कमी होतात. आताही यूपी च्या निवडणुका डोळ्यासमोर ठेवून हे दर कमी होताहेत का? आमदार रोहित पवारांचा सवाल

सेवानिवृत्त वरिष्ठ अधिकार्‍याच्या घरात चोरी, 43 लाख 50 हजार रूपयाचा ऐवज लंपास

शहरात सर्वत्रच दिवाळी उत्साहात साजरी होत असतानाच एक बातमी समोर आली आहे. पुण्यात मुंढवा परिसरात राहणार्‍या महसूल विभागातील एका सेवानिवृत्त वरिष्ठ अधिकार्‍याच्या घरात चोरी झाली आहे. चोरटयांनी लक्ष्मी पूजनाच्या दिवशीच रात्री साडेआकरा वाजण्याच्या दरम्यान लक्ष्मी पूजनामध्ये ठेवलेले तब्बल 150 तोळे सोन्याचे दागिने आणि अडीच लाख रूपये असा एकूण 43 लाख 50 हजार रूपयाचा ऐवज लंपास केला आहे. याप्रकरणी दत्तात्रय संभाजी डोईफोडे यांनी मुंढवा पोलीस ठाण्यात फिर्याद दिली आहे. डोईफोडे हे महसूल विभागातून निवृत्त झाले आहेत. त्यांचे चिरंजीव सागर दत्तात्रय डोईफोडे हे आयएएस अधिकारी असून सध्या त्यांची नेमणूक जम्मू-काश्मीरमध्ये आहे. गुरूवारी लक्ष्मी पूजन असल्याने दत्तात्रय डोईफोडे यांनी घरातील जवळपास सर्वच पारंपारिक दागिने पूजनामध्ये ठेवले होते. त्यामध्ये मंगळसूत्र, नेकलेस, मोहनमाळ, बांगडया, तोडे, ब्रेसलेट, पाटल्या तसेच हिर्‍याचे सेट आणि रोख रक्कम 2 लाख 50 हजार रूपयांचा समावेश होता. एकुण 150 तोळे वजनाचे दागिने आणि 2 लाख 50 हजार रूपये रोख असा एकूण 43 लाख 50 हजार रूपयांचा ऐवज पुजनामध्ये ठेवण्यात आला होता. डोईफोडे यांचे घर गुरूवारी रात्री 11.30 ते शुक्रवारी पहाटे 4 वाजण्याच्या दरम्यान कुलूप लावून बंद होते. त्यावेळी चोरटे बंगल्याचे गेटचे कुलूप तोडून व हॉलचे खिडकीचा गज कापून आत प्रवेश केला. आणि पूजनामधील सर्व दागिने आणि रोख रक्कम असा एकूण 43 लाख 50 हजार रूपयांचा ऐवज लंपास केला. वरिष्ठ पोलीस अधिकार्‍यांनी घटनास्थळी भेट दिली आहे. मुंढवा पोलीस ठाण्यातील अधिकारी आणि गुन्हे शाखेचे अधिकारी चोरटयांचा शोध घेत आहेत...

पिंपरी चिंचवड शहरातील विविध भागात पावसाची हजेरी

पिंपरी चिंचवड शहरातील विविध भागात पावसाने हजेरी लावली आहे.  दिवाळीत फटाके फोडणाऱ्यांच्या आनंदावर पाणी. फटाके फोडणाऱ्यांनी धरली घरची वाट. अचानक पाऊस आल्याने अनेकांची भंबेरी उडाली आहे. 

18:30 PM (IST)  •  09 Nov 2021

पुण्यात गेल्या 24 तासात 113 कोरोनाबाधित रुग्णांची नोंद तर 59 रुग्णांनी केली कोरोनावर मात

पुण्यात गेल्या 24 तासात 113 कोरोनाबाधित रुग्णांची नोंद झाली आहे. तर 59 रुग्णांनी कोरोनावर मात केली आहे. पुण्यात आतापर्यंत 495141 रुग्ण कोरोनामुक्त झाले आहेत. पुण्यात गेल्या 24 तासात एकाही कोरनाबाधित रुग्णाचा मृत्यू झाला नाही. सध्या पुण्यात 701 सक्रिय रुग्ण आहेत. आज पुण्यात 5054 नागरिकांची स्वॅब तपासणी झाली आहे.

16:45 PM (IST)  •  09 Nov 2021

किरण गोसावीला न्यायालयीन कोठडी

किरण गोसावीला पुण्यातील फरासखाना पोलीस ठाण्यात नोंद असलेल्या गुन्हाबाबत न्यायालयीन कोठडी सुनावण्यात आली आहे. त्यामुळे आज त्याची रवानगी येरवडा कारागृहात करण्यात आली आहे. मात्र लगेच पुण्यातील लष्कर पोलीस ठाण्यात दाखल असलेल्या आणखी एका गुन्हाबाबत पोलीसांनी त्याला अटक दाखवून त्याचा ताबा घेण्यासाठी न्यायालयात अर्ज केला आहे. ती प्रक्रिया पूर्ण झाल्यावर किरण गोसावीला उद्या लष्कर पोलीसांच्या ताब्यात दिले जाईल. 

13:18 PM (IST)  •  09 Nov 2021

खासदार अमोल कोल्हे रविवार पासून संपर्क क्षेत्राबाहेरच!

दिवाळी संपल्यापासून पुण्यातील राष्ट्रवादीचे शिरूरचे खासदार अमोल कोल्हे हे कोणाच्या ही संपर्कात नाहीत. रविवारी सायंकाळपासून त्यांच्याशी संपर्क साधण्याचा प्रयत्न अनेकांकडून केला जातोय. संपर्काबाहेर जाण्यापूर्वी त्यांनी एक पोस्ट सोशल मीडियावर शेअर केली होती. या पोस्टमध्ये त्यांनी लिहीले होते,'आता सिंहावलोकनाची वेळ आलीये. गेल्या काही दिवसांत, महिन्यांत, वर्षांत बेभान होऊन धावत राहिलो, काही टोकाचे निर्णय घेतले, अनपेक्षित पावलं उचलली.  पण हे सगळं जुळवताना झालेली ओढाताण, तारेवरची कसरत, वेळेची गणितं, ताणतणाव यामुळे जरा थकवा आलाय. थोडा शारीरिक, बराचसा मानसिक! शारीरिक थकवा आरामाने निघून जाईल पण मानसिक थकवा घालवण्यासाठी हवं- थोडं मनन, थोडं चिंतन! घेतलेल्या निर्णयांचा विचार आणि कदाचित फेरविचार सुद्धा करण्याची गरज त्यांनी या पोस्ट मधून व्यक्त केली. त्यासाठीच मी एकांतवासात जातोय. काही काळ संपर्क होणार नाही. पुन्हा लवकरच भेटू... नव्या जोमाने, नव्या जोशाने. पण हे नमूद करताना फक्त चिंतनासाठी जातोय, चिंतन शिबिरासाठी नाही.' त्यामुळं खासदार अमोल कोल्हेंच्या मनात नेमकं काय आहे, अशी चर्चा राजकीय वर्तुळासह जनमानसात सुरु झाली. दिवाळी संपली अन तेंव्हापासून आत्तापर्यंत अमोल कोल्हेंचा ना फोन लागतोय, ना त्यांच्या नातेवाईकांना किंवा तिन्ही स्वीय सहाय्यकांना ते कुठं आहेत, हे सांगता येतंय. त्यांच्यासोबत त्यांच्या पत्नी असल्याचं मात्र सांगितलं जातंय. एरवी सोशल मीडियावर त्यांच्या संदर्भात पडणाऱ्या पोस्ट त्यांची सोशल मीडियाची टीम अथवा स्वीय सहाय्यकांकडून टाकल्या जायच्या. पण सिंहावलोकनाची वेळ आल्याची पोस्ट स्वतः खासदार कोल्हेंनी टाकल्याचं त्यांचे स्वीय सहाय्यक सांगतात.