Pune News: पिंपरी पालिकेच्या आयुक्तांकडून विधानसभा उपसभापतींचा अवमान? बनसोडे संतापले, चौकशीची मागणी, नेमकं काय घडलं?
Pune News: शहरातील नव्यानं सादर झालेला विकास आराखडा रद्द करण्याची मागणी करणारे निवेदन देण्यासाठी बनसोडे पालिकेत आले होते.
पुणे : पिंपरी चिंचवड महापालिकेच्या प्रवेशद्वारावर विधानसभेचे उपसभापती अण्णा बनसोडेंचा अवमान झाला. शहरातील नव्यानं सादर झालेला विकास आराखडा रद्द करण्याची मागणी करणारे निवेदन देण्यासाठी अण्णा बनसोडे महानगर पालिकेत आले होते. मात्र पालिकेचे आयुक्त शेखर सिंह हजर नव्हते, ते विभागीय आयुक्त कार्यालयात बैठकीला गेले होते. परंतु इतर अतिरिक्त आयुक्तांनी उपसभापती पदाचा प्रोटोकॉल राखायला हवा होता. तसं न घडल्यानं अण्णा बनसोडे चांगलेच संतापले. त्यामुळं बनसोडेंवर पालिकेच्या पायऱ्यांवर बसून आयुक्तांचा निषेध करण्याची वेळ आली. मी या प्रकरणाची मुख्यमंत्री आणि उपमुख्यमंत्र्यांकडे चौकशीची मागणी करणार आहे. आयुक्त राजकारण करत असल्याचा आरोप ही यावेळी करण्यात आला. पिंपरी चिंचवडमध्ये भाजप विरुद्ध अजित पवार गट अशी थेट लढत होणार आहे. यानिमित्ताने देवेंद्र फडणवीस विरुद्ध अजित पवार आमने-सामने उभे टाकणार आहेत. त्याची प्रचिती आजच्या या घटनेने आली.
बनसोडे नेमकं काय म्हणाले?
अण्णा बनसोडे बोलताना म्हणाले की, आज इथं आयुक्त थांबले नाहीत, हे चुकीचं आहे. पण त्यांना माहित नाही राज्याचे उपमुख्यमंत्री अजित पवार यांच्या नेतृत्वाखाली पिंपरी चिंचवड शहराचा विकास झालेला आहे. पिंपरी चिंचवड शहराचा विकास होत असताना नव्याने विकास आराखडा तयार करण्याचं काम गेली दोन महिन्यापासून सुरू आहे. त्या विकास आराखड्यामध्ये खऱ्या अर्थाने जे आरक्षण टाकले आहेत, त्या आरक्षण चुकीचे टाकलेले आहेत, प्रशासनावरती आणि यांच्यावरती देखरेख करायला पाहिजे, त्या पद्धतीने झालेले नाहीत, जवळजवळ 50 हजार हरकती आल्या होत्या. त्या सर्वांचा रोष धरूनच आज जन आक्रोश मोर्चा आयोजित केला होता, अशी माहिती अण्णा बनसोडेंनी दिली आहे.
पुढे बनसोडे म्हणाले, जनतेच्या मनातील प्रश्न आम्ही मांडायला इथे आलो. मात्र, इथे आयुक्त नाहीत ही दुर्दैवी बाब आहे. ते आयुक्त असले तरी ते पिंपरी चिंचवड शहराच्या भाग्यविधाते नाहीत. ते आज कमिशनर म्हणून इथे काम करत आहेत. त्यांचं आजचं वागणं दुर्दैवी आहे. आजच्या त्यांच्या वागण्याबद्दल मी देवेंद्र फडणवीस, अजित पवार आणि एकनाथ शिंदे यांच्याकडे चौकशीची मागणी करणार आहे. आज या ठिकाणी पक्षाचे सर्व पदाधिकारी प्रमुख नगरसेवक अध्यक्ष सर्वजण या ठिकाणी आले होते, आमच्या सर्वांचा अपमान केला आहे. त्यामुळे आजचे हे निवेदन त्यांना न देता हेच निवेदन राज्याचे मुख्यमंत्री त्यांच्या स्वाधीन करतील. आज या ठिकाणी जितके शिष्टमंडळ उपस्थित आहे हेच शिष्टमंडळ उद्या जाऊन मुख्यमंत्र्यांनी निवेदन देतील असेही पुढे अण्णा बनसोडे यांनी म्हटलं आहे.
महत्त्वाच्या बातम्या
