एक्स्प्लोर

Harshvardhan Patil: इंदापुरात राष्ट्रवादी विरूध्द राष्ट्रवादी? हर्षवर्धन पाटलांकडून तुतारी फुंकण्याचे संकेत; शरद पवार भाकरी फिरवणार, घडामोडींना वेग

Harshvardhan Patil: हर्षवर्धन पाटील यांनी आजच शरद पवारांची भेट घेतली असून त्यांच्या लेकीने स्टेटवर तुतारी वाजवणारा माणूस हे शरद पवारांच्या पक्षाचे चिन्ह ठेवल्याचं दिसून आलं आहे. यामुळे आता इंदापूर मतदारसंघात शरद पवार भाकरी फिरवणार अशी चर्चा सुरू झाली आहे.

By : जयदीप भगत, बारामती | Edited By: Ankita Khane | Updated at : 03 Oct 2024 04:40 PM (IST)

Harshvardhan Patil may be join Sharad pawar Party

Source : PTI

पुणे : महायुतीमध्ये राष्ट्रवादी काँग्रेस अजित पवार (Ajit pawar) यांच्या पक्षाच्या येण्याने विधानसभा निवडणुकांच्या तोंडावर भाजप नेते आणि माजी मंत्री हर्षवर्धन पाटील (Harshvardhan Patil) यांची चांगलीच तारांबळ उडाली आहे. महायुतीमधील चर्चेप्रमाणे विद्यमान आमदाराची जागा त्या त्या पक्षाला सुटणार आहे. इंदापूरचे आमदार दत्तात्रय भरणे यांनी निवडणुकांसाठीच्या प्रचारालाही सुरुवात केली आहे. त्यामुळे, हर्षवर्धन पाटील यांच्या उमेदवारीची शक्यता कमी झाली आहे, यामुळे आता त्यांनी तुतारी हाती घेण्याचा निर्धार केल्याची चर्चा केली आहे. आता, पुढील 4 ते 5 दिवसांत हर्षवर्धन पाटील (Harshvardhan Patil) तुतारी हाती घेत शरद पवारांच्या राष्ट्रवादी काँग्रेसमध्ये प्रवेश करणार असल्याचे स्पष्ट झालं आहे. हर्षवर्धन पाटील यांनी आजच शरद पवारांची भेट घेतली असून त्यांच्या लेकीने स्टेटवर तुतारी वाजवणारा माणूस हे शरद पवारांच्या पक्षाचे चिन्ह ठेवल्याचं दिसून आलं आहे. यामुळे आता इंदापूर मतदारसंघात शरद पवार भाकरी फिरवणार अशी चर्चा सुरू झाली आहे.

गेल्या अनेक दिवसांपासून हर्षवर्धन पाटील (Harshvardhan Patil) तुतारी फुंकणार अशी चर्चा होती, त्याचबरोबर शरद पवारांसोबत त्यांचे बॅनर देखील लावण्यात आलेले होते, त्यानंतर पाटील कोणता निर्णय घेणार अशा चर्चा सुरू होत्या अशातच त्यांच्या मुलीने देखील याबाबतचे संकेत दिले आहेत. त्याचबरोबर जर भाजपने त्यांना उमेदवारी दिली नाही तर आगामी विधानसभा निवडणूक हर्षवर्धन पाटील अपक्ष लढणार का? असा प्रश्न उपस्थित होत होता. मात्र, गेल्या काही दिवसांपासून सुरू असलेल्या तुतारीच्या चर्चांवर आता शिक्कामोर्तब झालं आहे. हर्षवर्धन पाटील यांनी आज शरद पवारांची (Sharad Pawar) भेट घेतली असून उद्याच पत्रकार परिषद घेऊन ते आपल्या प्रवेशाची घोषणा करतील. दुसरीकडे त्यांची कन्या अंकिता यांनी देखील व्हॉट्सअप स्टेटसवर राष्ट्रवादी काँग्रेस शरदचंद्र पवार पक्षाचे तुतारी वाजवणार माणूस हे चिन्ह ठेवल्याने त्यांचा राष्ट्रवादी प्रवेश निश्चित मानला जात आहे.