Pune Food and Drug Administration Action: तुम्ही भेसळयुक्त गूळ खाताय? दौंडमध्ये अन्न व औषध प्रशासाने 324 किलो भेसळयुक्त गूळ केला जप्त
अन्न व औषध प्रशासनाने दौंड तालुक्यातील बोरीपार्धीमधील महाराज गूळ उद्योग उत्पादकाच्या गुऱ्हाळ घरावर छापा टाकून 28 हजार 800 रुपये किंमतीचा भेसळयुक्त गूळ तर 22 हजार 100 रुपये किंमतीची साखर जप्त केली.
Pune Food and Drug Administration Action: सणासुदीच्या दिवसांमुळे अन्न व औषध प्रशासाने कंबर कसली आहे. अन्न व औषध प्रशासनाने दौंड तालुक्यातील बोरीपार्धीमधील मे. महाराज गूळ उद्योग उत्पादकाच्या गुऱ्हाळ घरावर छापा टाकला आहे. 28 हजार 800 रुपये किंमतीचा सुमारे 324 किलो भेसळयुक्त गूळ तर 22 हजार 100 रुपये किंमतीची 650 किलो भेसळयुक्त साखर जप्त केली. अन्न व औषध प्रशासनातर्फे भेसळयुक्त गूळ आणि साखर वापरणाऱ्या गूळ उत्पादकावर कारवाई करताना या प्रकरणी घेण्यात आलेले दोन्ही नमुने विश्लेषणासाठी पाठविण्यात आले आहेत. अहवाल प्राप्त झाल्यानंतर पुढील कारवाई करण्यात येणार आहे. तपासणीमध्ये आढळून आलेल्या त्रुटीच्या अनुषंगाने विक्रेत्यास 20 हजार रुपये तडजोड शुल्क इतका दंड आकारण्यात आला आहे.
याबाबत प्रशासनास मोठ्या प्रमाणात तक्रारी प्राप्त होत असल्याने प्रशासनामार्फत लवकरच विशेष मोहिम राबविण्यात येणार आहे. याप्रकरणी गैरप्रकार आढळून येणाऱ्या गुऱ्हाळ घरावर कडक कारवाई करण्यात येणार आहे. तरी जिल्ह्यातील सर्व गुऱ्हाळ चालकांनी अन्न सुरक्षा व मानदे कायदा 2006 या कायद्याअंतर्गत आवश्यक असलेला परवाना प्राप्त करुनच गूळ उत्पादन करावे. याबाबतीत माहिती असल्यास प्रशासनाच्या 1800222365 या टोल फ्री क्रमांकवर संपर्क साधण्याचे आवाहन अन्न व औषध प्रशासन पुणे विभागाचे सहायक आयुक्त संजय नारागुडे यांनी केले आहे.
एक महिन्यापूर्वीदेखील दौंड तालुक्यातील खामगाव फाटा, कासुर्डी येथील दोन गुऱ्हाळ घरांवर धाडी टाकून 2 लाख 19 हजार 600 रुपये किंमतीचा सुमारे 7 हजार 313 किलो भेसळयुक्त गुळ तर 83 हजार 440 रुपये किंमतीची 2 हजार 750किलो भेसळयुक्त साखर जप्त केली आहे. अन्न व औषध प्रशासनाने ही मोठी कारवाई केली आहे. चॉकलेट, भेसळयुक्त गुळ व साखर वापरणाऱ्या गुळ उत्पादकावर अन्न व औषध प्रशासनातर्फे कारवाई करण्यात येत आहे. जानेवारी 2022 मध्ये दोन गुळ उत्पादकावर धाडी टाकून 3 लाख 67 हजार 900 रुपये किंमतीचा सुमारे 7 हजार 162किलो गुळाचा साठा जप्त करण्यात आला होता.
नागरिकांच्या जीवाला धोका
चॉकलेट, भेसळयुक्त गूळ व साखर वापरणाऱ्या गूळ उत्पादकावर अन्न व औषध प्रशासनातर्फे कारवाई करण्यात येत आहे. या सगळ्यांच्या विक्रीमुळे नागरीकांच्या जीवाला धोका निर्माण होऊ शकतो. मुदत संपलेले चॉकलेट विक्रीने देखील बालकांच्या जीव धोक्यात येण्याची शक्यता आहे. त्यामुळे तातडीने ही करावाई करण्यात आली आहे.
महत्त्वाच्या बातम्या
ट्रेंडिंग न्यूज
