Pune Leopard Attack: अखेर तिघांचे जीव घेणाऱ्या नरभक्षक बिबट्या ठार; बेशुद्ध करण्यासाठी डार्ट मारला पण... वनविभागाच्या कर्मचाऱ्यांवर हल्ला करण्याचा प्रयत्न; तीन राऊँड फायर अन्
Pune Leopard Attack: ६ वर्ष वयाचा नर जातीचा हा नरभक्षक बिबट्या आहे. 13 वर्षीय रोहनचा जीव ज्या ठिकाणी घेतला तिथून 400 मीटर अंतरावर या बिबट्याला ठार करण्यात आलं. हा तोच नरभक्षक बिबट्या असल्याचं त्याच्या नमुन्यांवर आणि ठस्यांवरून स्पष्ट झालं आहे.
पुणे: अखेर शिरूर तालुक्यातील पिंपरखेड येथे नरभक्षक बिबट्याला ठार करण्यात वन विभागाला (Pune Leopard Attack) यश आलं आहे, रात्री उशिरा गावामध्ये बिबट्याचा शोध घेत असताना वन विभागाला हा बिबट्या ड्रोनमध्ये दिसला. नंतर या बिबट्याला पकडण्यासाठी डार्ट मारण्याचा प्रयत्न केला गेला, डार्ट मिस झाला. मात्र यामुळं सावध झालेल्या बिबट्याने थेट वनविभागाच्या कर्मचाऱ्यांवरती प्रतिहल्ला (Pune Leopard Attack) करण्याचा प्रयत्न केला. मग शेवटी दोन शार्प शूटरने या बिबट्यावरती तीन राऊँड फायर केले, यात बिबट्या ठार झाला. ६ वर्ष वयाचा नर जातीचा हा नरभक्षक बिबट्या आहे. 13 वर्षीय रोहनचा जीव ज्या ठिकाणी घेतला तिथून 400 मीटर अंतरावर या बिबट्याला ठार करण्यात आलं. हा तोच नरभक्षक बिबट्या असल्याचं त्याच्या नमुन्यांवर आणि ठस्यांवरून स्पष्ट झालं आहे.(Pune Leopard Attack)
Pune Leopard Attack: तिघांचा जीव घेणारा बिबट्या
बिबट्याच्या हल्ल्याने मृत्यू झाल्यानंतर संतप्त नागरिकांच्या मागणीची घेतली दखल घेत शिरूर तालुक्यातील दोन बालकांसह तिघांचा जीव घेणाऱ्या बिबट्याला दिसताक्षणी गोळ्या घालण्याचे आदेश अखेर वनविभाकडून देण्यात आले होते. काही दिवसांपूर्वी पिंपरखेळ येथे बिबट्याच्या हल्ल्यात पाच वर्षांच्या शिवन्या बोंबेचा मृत्यू झाला होता. २२ ऑक्टोबर रोजी भागाबाई रंगनाथ जाधव (वय ७०, मौजे जांबुत, ता. शिरूर) या वृद्ध महिलेचा याच बिबट्याच्या हल्ल्यात दुर्दैवी मृत्यू झाला होता. त्यानंतर शनिवारी (दि. १) रोहन विलास बोंबे या १३ वर्षीय मुलावर बिबट्याने हल्ला करत त्याला ठार केले होते. सातत्याने नागरिकांवर होणाऱ्या बिबट्या हल्ल्यांमुळे नागरिकांमध्ये दहशतीचे वातावरण निर्माण झाले होते. त्यानंतर जीव घेणाऱ्या बिबट्याला जेरबंद करण्यात यावे, अशी मागणी सातत्याने केली जात होती. मात्र, त्याला यश येत नव्हते. त्यामुळे आक्रमक झालेल्या नागरिकांनी आंदोलन करत जाळपोळदेखील केली होती. अखेर त्या बिबट्याला ठार करण्यात यश आलं आहे.
Pune Leopard Attack: संतप्त नागरिकांनी मोठ्या प्रमाणात जाळपोळ केली
पिंपरखेड व परिसरामध्ये मागील वीस दिवसांमध्ये दिनांक १२ ऑक्टोंबरला शिवन्या शैलेश बोंबे, वय ५ वर्ष ६ महिने, दिनांक २२ ऑक्टोंबरला भागुबाई रंगनाथ जाधव, वय ८२ वर्षे आणि रोहन विलास बोंबे वय १३ वर्षे यांचे दुर्दैवी मृत्यू बिबट्याच्या हल्ल्यामध्ये झाल्याने मोठ्या प्रमाणात संताप उसळून जुन्नर,शिरूर, आंबेगाव व खेड तालुक्यामधील मोठ्या प्रमाणात वाढलेल्या बिबट्याच्या हल्ल्याच्या निषेधार्थ १२ ऑक्टोंबरला व २२ ऑक्टोंबरला पंचतळे येथे बेल्हे जेजुरी राज्यमार्ग रोखून तसेच दिनांक ३ नोव्हेंबरला मंचर येथे पुणे नाशिक महामार्ग रोखून वरील चारही तालुक्यातील ग्रामस्थांनी तीव्र आंदोलन केले होते. तसेच २ नोव्हेंबरला बिबट्याच्या हल्ल्यात रोहन विलास बोंबे या १३ वर्षाच्या लहान मुलाचा मृत्यू झाल्याने संतप्त जमावाने वनविभागाच्या गस्ती वाहन तसेच येथील स्थानिक बेस कॅम्प इमारत पेटवून देऊन मोठ्या प्रमाणात जाळपोळ केली होती.
Pune Leopard Attack: पुणे नाशिक महामार्ग सुमारे 18 तास रोखून धरला
३ नोव्हेंबरला संतप्त नागरिकांनी पुणे नाशिक महामार्ग सुमारे 18 तास रोखून धरला होता. नरभक्षक झालेल्या पिंपरखेड परिसरातील बिबट्यास जेरबंद किंवा ठार करण्यासाठी वनसंरक्षक पुणे आशिष ठाकरे यांनी तातडीने प्रधान मुख्य वनसंरक्षक वन्यजीव तथा मुख्य वन्यजीव रक्षक महाराष्ट्र राज्य नागपूर यांची परवानगी घेतली होती, हा नरभक्षक बिबट्या जेरबंद किंवा ठार करण्यासाठी वन विभागाने रेस्क्यू संस्था पुण्याचे डॉ. सात्विक पाठक पशु चिकीत्सक, जुबिन पोस्टवाला व डॉक्टर प्रसाद दाभोळकर या दोन शार्प शूटरसह वनविभागाची टीम घटनास्थळ परिसरात तैनात करून सदर नरभक्षक बिबट्यास जेरबंद करण्याची कारवाई सुरू करण्यात आली.
Pune Leopard Attack: बेशुद्ध करण्यासाठी डार्ट मारला, परंतु तो अपयशी
दिवसभरात परिसरात ठीक ठिकाणी कॅमेरा ट्रॅप लावून बिबट्याचे भ्रमण मार्गावरील ठशांचे निरीक्षण करण्यात आले. त्यानंतर रात्री तीन थर्मल ड्रोनच्या माध्यमातून घटनास्थळाच्या परिसरामध्ये त्या नरभक्षक बिबट्याचा शोध घेतला असता घटनास्थळापासून सुमारे 400 ते 500 मीटर अंतरावर बिबट्या दिसून आला असता टीमने त्यास बेशुद्ध करण्यासाठी डार्ट मारला, परंतु तो अपयशी ठरल्याने बिबट्या चवताळून प्रति हल्ला करत असताना बंदूकधारी शार्प शूटर यांनी त्यावर रात्री 10.30 वाजताच्या सुमारास गोळी झाडल्याने नर बिबट्या मृत झाला असून त्याचे वय अंदाजे पाच ते सहा वर्ष असल्याचे दिसून आले, त्यानंतर सदर नरभक्षक बिबट्याचे शव मौजे पिंपरखेड येथील ग्रामस्थांना दाखविण्यात आले त्यानंतर सदर शव शवविच्छेदना करिता माणिकडोह बिबट निवारा केंद्र येथे हलविण्यात आले अशी माहिती समोर आली आहे.
महत्त्वाच्या बातम्या
