Maharashtra Political Crisis : कावळा काव काव करत राहिला पण कोकीळेला न्याय मिळाला; निकालानंतर चित्रा वाघ यांनी विरोधकांना डिवचलं
भाजप नेत्या चित्रा वाघ यांनी ट्विट करत विरोधकांवर निशाणा साधला आहे. कावळा काव काव करत राहिला पण कोकीळेला न्याय मिळाला, असं म्हणत त्यांनी विरोधकांनी डिवचलं आहे.
Maharashtra Political Crisis : महाराष्ट्राच्या सत्तासंघर्षाचा (Maharashtra Political Crisis) निकाल अखेर लागला असून शिंदे-फडणवीस सरकार (Eknath Shinde)वाचले आहे. सगळं बेकायदेशीर मात्र सरकार कायदेशीर असं या निकालातून समोर आलं आहे. असं असताना भाजप नेत्या चित्रा वाघ यांनी ट्विट करत विरोधकांवर निशाणा साधला आहे. 'कावळा काव काव करत राहिला पण कोकिळेला न्याय मिळाला', असं म्हणत त्यांनी विरोधकांनी डिवचलं आहे.
महाराष्ट्राच्या सत्तासंघर्षाच्या निकालाकडे सगळ्या महाराष्ट्राचं लक्ष लागलं होतं. विरोधकांनी सरकार पडणार असल्याचं वक्तव्य अनेकदा केलं होतं. 16 आमदार अपात्र ठरणार आणि शिंदे-फडणीस कोसळणार, अशी टीका विरोधकांनी केली होती. त्यानंतर या सगळ्याचा आज निकाल जाहीर झाला. सरन्यायाधीश चंद्रचूड यांनी हा निकाल वाचून दाखवला. यानुसार सुप्रीम कोर्टाने राज्यपालाच्या भूमिकेवर ताशेरे ओढले, याचबरोबर भरत गोगावले प्रतोद म्हणून नियुक्ती बेकादेशीर असल्याचे सांगितले आणि संपूर्ण निकालातून शिंदे फडणवीस सरकार वाचलं असल्याचं स्पष्ट होत आहे.
'कावळा काव काव करत राहिला पण कोकिळेला न्याय मिळाला'
भाजप नेत्या चित्रा वाघ यांनी ट्वीट करत प्रतिक्रिया दिली आहे. यातून त्यांनी उद्धव ठाकरे आणि सगळ्या विरोधकांना डिवचलं आहे. चित्रा वाघ यांनी ट्विटमध्ये म्हटलंय की, उद्धव ठाकरेंनी सुप्रीम कोर्टात सांगितलं होतं की कावळा कोण आणि कोकिळा कोण हे निकालातून कळेल. आता हे सिद्ध झालंच. कावळा कोण आणि कोकिळा कोण? कावळा काव काव करत राहिला पण कोकिळेला न्याय मिळाला. लोकशाहीचाच हा विजय. राज्यात शिंदे-फडणवीस सरकारच राहणार, असं म्हणत त्यांनी सगळ्यांचं अभिनंदन केलं आहे.
निकालामुळे आम्ही समाधानी...
या निकालावर प्रतिक्रिया देताना उपमुख्यमंत्री देवेंद्र फडणवीस यांनी समाधान व्यक्त केलं आहे. ते म्हणाले की, सुप्रीम कोर्टाच्या निकालामुळे आम्ही संपूर्ण समाधानी आहोत. शिंदे-फडणवीस सरकार पडणार असं जी लोकं कालपर्यंत उड्या मारत होते. त्याच्या सर्व टीकेवर पाणी फेरल्या गेलं आहे. ज्या विरोधांनी अनेक चर्चा केल्या त्या चर्चाही व्यर्थ होत्या. हे सगळं या निकालातून पूर्णपणे समोर आलं आहे.
सुप्रीम कोर्टानं काय म्हटलं?
भरत गोगावले प्रतोद म्हणून नियुक्ती बेकादेशीर, अधिकृत व्हिप कोण हे जाणून घेण्याचा प्रयत्न झाला नाही, विधानसभा अध्यक्ष राहुल नार्वेकर यांच्याबाबत सुप्रीम कोर्टाचं निरीक्षण. अपात्रतेपासून वाचण्यासाठी आम्हीच खरा पक्ष आहोत, हा बचाव होऊ शकत नाही. सरकारवर शंका घेण्याचं कारण राज्यपालांकडे नव्हतं. बहुमत चाचणी बोलावण्याची गरज नव्हती. पक्षांतर्गत वाद मिटवण्यासाठी बहुमत चाचणीचा वापर नको. उद्धव ठाकरे यांनी राजीनामा दिला नसता तर आम्ही त्यांना मुख्यमंत्री म्हणून पुनर्स्थापित करण्याचा निर्णय दिला असता.
महत्त्वाच्या बातम्या
ट्रेंडिंग न्यूज
