बालेकिल्ल्यातील डॅमेज कंट्रोलसाठी अजित पवार अॅक्शन मोडमध्ये, पिंपरी-चिंचवडच्या रखडलेल्या विकासाला वेग; अधिकाऱ्यांना दिले 'हे' आदेश

पशुसंवर्धन विभागामार्फत जमिनीचे मूल्यांकन करून मोबदला निश्चित करण्यात येईल. हा मोबदला भरून महापालिकेने जमीन लवकरात लवकर ताब्यात घ्यावी, असे निर्देश उपमुख्यमंत्री अजित पवार यांनी दिले.  

Ajit Pawar

Source : Ajit Pawar

मुंबई : राष्ट्रवादी काँग्रेस अजित पवार (Ajit Pawar)  गटाला काही दिवसांपूर्वी बालेकिल्ल्यामध्ये मोठं खिंडार पडलं. पिंपरी चिंचवडमध्ये (Pimpri Chinchwad) राष्ट्रवादी काँग्रेस अजित पवार गटाच्या अनेक नेत्यांनी आणि पदाधिकाऱ्यांनी शरद पवारांच्या राष्ट्रवादीमध्ये प्रवेश केला. बालेकिल्ल्यातील या डॅमेज कंट्रोलसाठी अजित पवार अॅक्शन मोडमध्ये आले आहेत. स्वत: अजित पवार पिंपरी-चिंचवडध्ये लक्ष  घालत आहे.  अनेक  वर्षापासून कासवगतीने असलेल्या ताथवडे येथील स्पाईन रस्ता, उड्डाणपूल, एसटीपी यासारख्या  नियोजित नागरी सुविधा उभारणीचा  कामांचा आढावा घेत कामे लवकरात लवकर करण्याचे निर्देश दिले आहे.  त्यासाठी त्यांनी अधिकाऱ्यांची बैठक घेतली.

पुणे-नाशिक आणि पुणे-मुंबई महामार्ग जोडण्यासाठी नवनगर विकास प्राधिकरणाने स्पाइन रस्ता उभारला आहे. त्यामुळे त्रिवेणीनगर येथील नागरिकांच्या मिळकती बाधित झाल्या आहेत. त्या नागरिकांच्या पुनर्वसनाचा प्रश्न रखडला होता. या रखडलेल्या प्रोजेक्टसाठी महापालिकेला आवश्यक असणाऱ्या नागरी सुविधांसाठी लागणाऱ्या जमीन हस्तांतरणासंदर्भातील प्रस्ताव तातडीने पशुसंवर्धन विभागास सादर करावा. पशुसंवर्धन विभागामार्फत जमिनीचे मूल्यांकन करून मोबदला निश्चित करण्यात येईल. हा मोबदला भरून महापालिकेने जमीन लवकरात लवकर ताब्यात घ्यावी, असे निर्देश उपमुख्यमंत्री अजित पवार यांनी दिले.    

मोबदला भरून महापालिकेने जमीन लवकरात लवकर ताब्यात घ्यावी : अजित पवार

अजित पवार बैठकीत  म्हणाले की, ताथवडे परिसरासह पिंपरी-चिंचवड महापालिका आणि पुणे महानगर विकास प्राधिकरण क्षेत्रात लोकसंख्या वेगाने वाढत आहे. या क्षेत्रात विविध उद्योग घटकांसह नवीन आयटी कंपन्याही येत आहेत. या सर्वांचा विचार करता ताथवडे येथील पशुसंवर्धन विभागाच्या जागेवर पिंपरी-चिंचवड महापालिकेमार्फत स्पाईन रस्ता आणि मलनिस्सारण प्रक्रिया प्रकल्प उभारण्यात येणार आहे. त्यामुळे शहराच्या विकास आराखड्यात ताथवडे येथील जागेचा समावेश करण्यात आला आहे. या जमिनीवर नागरी सुविधांची काही आरक्षणे टाकण्यात आली आहेत. पीएमआरडीए क्षेत्राचा विचार करता ताथवडे येथील मध्यवर्ती ठिकाणी मोठ्या प्रमाणात जागा उपलब्ध आहे. आवश्यक असणारी जागा महापालिकेला हस्तांतरित करण्यास पशुसंवर्धन विभाग सकारात्मक आहे. त्यामुळे महापालिकेला आवश्यक असणाऱ्या नागरी सुविधांसाठी लागणाऱ्या जमीन हस्तांतरणासंदर्भातील प्रस्ताव तातडीने पशुसंवर्धन विभागास सादर करावा. पशुसंवर्धन विभागामार्फत जमिनीचे मूल्यांकन करून मोबदला निश्चित करण्यात येईल. हा मोबदला भरून महापालिकेने जमीन लवकरात लवकर ताब्यात घ्यावी.

जागेच्या वापराचा सविस्तर आराखडा तयार करावा : अजित पवार

 ताथवडे परिसरासह पिंपरी चिंचवड येथील नागरिकांना वाहतूक कोंडीच्या समस्येला सामोरे जावे लागत आहे. वाहतूक कोंडीतून नागरिकांची सुटका व्हावी यासाठी वाल्हेकरवाडी चौक ते औंध-रावेत रस्त्यावरील डेअरी फार्म चौक ताथवडे पर्यंतचा 45 मीटर स्पाईन रस्ता प्रस्तावित करण्यात आला आहे. रस्त्याचे काम तातडीने सुरु करणे आवश्यक असल्याने जमीन हस्तांतर प्रक्रिया गतीने पार पाडावी. त्याचप्रमाणे येथील जमिनीवर 20 एमएलडी क्षमतेचा मैलाशुद्धीकरण प्रकल्प उभारण्यात येणार आहे. भविष्यात जास्त क्षमतेचा प्रकल्प उभारावयाचा असल्यास मध्यवर्ती ठिकाणी जमीन मिळण्यात अडचणी येतील. त्यामुळे प्रकल्पाच्या भविष्यातील क्षमतावाढीच्यादृष्टीने अधिकची जमीन संपादित करून घ्यावी. या ठिकाणी स्पाईन रस्ता, उड्डाणपूल, एसटीपी आणि इतर विकास कामांसाठी 13 एकर जागेचा प्रस्ताव आहे. आवश्यकतेनुसार आत्ताच या क्षेत्रफळात वाढ करून नवीन प्रस्ताव पाठवावा. महानगरपालिकेने या जागेच्या वापराचा सविस्तर आराखडा तयार करावा, अशा सूचना उपमुख्यमंत्री अजित पवार यांनी केल्या.

हे ही वाचा :