Salil Deshmukh : मनाला पटेल अशा योग्य उमेदवाराचाच प्रचार करणार, सलील देशमुखांची रोखठोक भूमिका; नागपुरातील निवडक प्रचारानं चर्चेला उधाण
Salil Deshmukh : फक्त योग्य आणि मनाला पटणाऱ्या उमेदवाराचाच प्रचार करेल, असे सांगत राष्ट्रवादी काँग्रेस शरदचंद्र पवार पक्षाचे नेते सलील देशमुख यांनी आपली नाराजी पुन्हा एकदा बोलून दाखवली आहे.
Salil Deshmukh नागपूर : फक्त योग्य आणि मनाला पटणाऱ्या उमेदवाराचाच प्रचार करेल, असे सांगत राष्ट्रवादी काँग्रेस शरदचंद्र पवार पक्षाचे नेते सलील देशमुख (Salil Deshmukh) यांनी आपली नाराजी पुन्हा एकदा बोलून दाखवली आहे. नागपुरात सलील देशमुख यांचा स्वतःच्या मतदारसंघात स्वतःच्या पक्षाशी आघाडीकरून नगराध्यक्ष पदाची निवडणूक लढवणाऱ्या शेकापच्या उमेदवाराचा प्रचार करण्यास एकप्रकारे नकार दिलाय. दरम्यान सलील देशमुख यांची खरी नाराजी काटोल येथील नगराध्यक्ष (Nagarpanchayat Election) पदाच्या उमेदवारी संदर्भात आहे. राष्ट्रवादी काँग्रेस शरद पवार पक्षाने त्या ठिकाणी नगराध्यक्ष पद स्वतःकडे न ठेवता ते शेकापकडे दिलं आहे. तसेच सलील देशमुख यांच्या विरोधात विधानसभा निवडणूक लढवत मत विभाजन घडवणाऱ्या शेकापचे नेते राहुल देशमुख यांच्या पत्नीला उमेदवारी दिल्यामुळे सलील देशमुख नाराज झाल्याची चर्चा आहे.
Salil Deshmukh : बळजबरीने डोक्यावर बसणाऱ्यांचा मी प्रचार करणार नाही
दरम्यान या संदर्भात बोलताना सलील देशमुख म्हणाले, शेकापचे नेते राहुल देशमुख योग्य उमेदवार नाही. बळजबरीने डोक्यावर बसणाऱ्यांचा मी प्रचार करणार नाही. फक्त खऱ्या सहकाऱ्यांचा प्रचार करणार. असे म्हणत आजारी असल्याचे सांगून सहा महिने पक्षाच्या कामापासून दूर राहण्याची घोषणा करणाऱ्या सलील देशमुख यांचा निवडक प्रचार मात्र आता चर्चेत आला आहे. शिवाय यामुळे पक्षाची डोके दुखी देखील वाढणार असल्याची शक्यता आहे.
Nagpur News : ऐन निवडणुकांची रणधुमाळी नागपुरात शरद पवार गटाला धक्का
नुकतेच माजी गृहमंत्री अनिल देशमुख यांचे सुपुत्र सलील देशमुख यांनी शरद पवार गटाचा पक्षाचा सक्रिय सदस्यत्वाचा राजीनामा दिल्याच्या घटनेने ऐन निवडणुकांची रणधुमाळी नागपुरात राष्ट्रवादी शरद पवार गटाला मोठा धक्का बसला. सलील देशमुख यांनी राष्ट्रवादी काँग्रेस पार्टी शरदचंद्र पवार पक्षाचे नेते शरद पवार, खासदार सुप्रिया सुळे आणि आमदार रोहित पवार यांना आपला राजीनामा पाठवला होता. जोवर माझी तब्येत पूर्णपणे बरी होत नाही, तोवर मी सिक लिव्हवर आहे. कारण आधी मला मी जिवंत रहायचे आहे, जिवंत राहिलो त्यानंतरच पक्षासाठी काम करू शकेल, अशी प्रतिक्रिया त्यांनी दिली होती.
मात्र, विधानसभा निवडणूकीत विरोधात लढलेल्या शेकापच्या राहुल देशमुख यांच्यासोबत आघाडी केली आणि काटोल नगर परिषद निवडणुकीत राहुल देशमुख यांना आघाडीकडून नगराध्यक्ष पदाचा उमेदवार केला. या गोष्टीला सलील देशमुख यांचा टोकाचा विरोध होता. मात्र वडिलांनी कार्यकर्त्यांच्या मतांना प्राधान्य देत विरोधातील उमेदवाराला पाठिंबा दिल्याने हीच बाब लेक सलील देशमुखांच्या जिव्हारी लागला असल्याचे बोललं जात आहे. अशातच आता सलील देशमुख यांनी प्रचार करण्यास विरोध केल्याने या चर्चेला अधिक बळ प्राप्त झालं आहे.
इतर महत्वाच्या बातम्या
महत्त्वाच्या बातम्या
