Raj Thackeray: सगळ्या गोष्टींचा मजाक बनवलाय; तुम्ही काय काय करता सगळ्या गोष्टी माझ्यापर्यंत येतात, राज ठाकरेंनी व्यक्त केला पदाधिकाऱ्यांच्या कामगिरीवर संताप

Raj Thackeray : मनसे अध्यक्ष राज ठाकरे यांनी पदाधिकाऱ्यांच्या कामगिरीवर संताप व्यक्त केला असल्याची माहिती समोर आली आहे.

Raj Thackeray

Source : Facebook

मुंबई: मनसेची पश्चिम उपनगरातील पदाधिकाऱ्यांची महत्त्वाची बैठक पार पडली. महाराष्ट्र नवनिर्माण सेनेची पश्चिम उपनगरातील पदाधिकाऱ्यांची महत्त्वाची बैठक काल (बुधवारी, ता ११) आयोजित करण्यात आली होती. दहिसर ते वांद्रे परिसरातील सर्व विधानसभा क्षेत्रातील पदाधिकारी या बैठकीसाठी उपस्थित होते. गोरेगाव पश्चिमेकडील एम्पायर बँक्वेट हॉलमध्ये ही बैठक पार पडली. या बैठकीला मनसे अध्यक्ष राज ठाकरे (Raj Thackeray) यांची प्रमुख उपस्थिती होती. महिला-पुरुष विभाग, शाखा व उपशाखा पदाधिकाऱ्यांना उपस्थित राहण्याचे आवाहन करण्यात आले होते. या बैठकीमध्ये मनसे अध्यक्ष राज ठाकरे (Raj Thackeray) यांनी पदाधिकाऱ्यांच्या कामगिरीवर संताप व्यक्त केला असल्याची माहिती समोर आली आहे. 

कुणी काय-काय काम केले हे मला आता बघायचं आहे

तुम्ही खाली काय करता, या सगळ्या गोष्टी माझ्यापर्यंत येतात. कुणी काय-काय काम केले हे मला आता बघायचं आहे. मी आता सगळ्या गोष्टींची शहानिशा करणार आहे. त्यात जर काही गोष्टी पुढे आल्या तर सोक्षमोक्ष लावेल. सगळ्या गोष्टींचा मजाक बनवला आहे. जर नवीन काही करायचे नसेल तर पक्षाच्या नवनिर्माण नावाला काय अर्थ आहे. सदस्य नोंदणी कुणी काय केलं याचे आकडे समोर येईलच, १९ तारखेला स्वारी आहे आपली, त्यासोबत राज ठाकरे महिला पदाधिकारी आणि कार्यकर्त्यांना देखील खडे बोल सुनावले आहेत. तुम्ही फक्त हळदी कुंकू करता हळदी कुंकू सोडून महिलांसाठी नवीन काय करता या संदर्भात विचारपूस केली असल्याची माहिती समोर आली आहे.(Raj Thackeray)

बैठकीदरम्यान राज ठाकरे यांनी पदाधिकाऱ्यांना संघटन मजबूत करण्यासाठी अधिक सक्रिय होण्याचे निर्देश दिल्याची माहिती समोर आली आहे. सदस्य नोंदणी, स्थानिक पातळीवरील जनसंपर्क आणि आगामी पक्षाच्या कार्यक्रमांच्या तयारीबाबत त्यांनी पदाधिकाऱ्यांकडून सविस्तर आढावा घेतला. पक्षाच्या कामात ढिलाई सहन केली जाणार नाही, असा स्पष्ट इशाराही त्यांनी दिल्याचे सांगितले जात आहे. येत्या काळात पक्षाच्या संघटनात्मक हालचाली अधिक वेगाने राबविण्याच्या दृष्टीने पदाधिकाऱ्यांना ठोस जबाबदाऱ्या देण्यात येणार असल्याचीही चर्चा बैठकीनंतर राजकीय वर्तुळात सुरू झाली आहे.