धनंजय मुंडेंचा हत्याप्रकरणाशी संबंध नाही, नैतिकतेतून राजीनामा, राष्ट्रवादीकडून पत्रक जारी!
श्री. धनंजय मुंडे यांचा या प्रकरणाशी संबंध आहे, असे तपासात समोर आलेले नाही. मात्र, नैतिकतेच्या मुद्यावर एक जबाबदार राजकीय नेता म्हणून धनंजय मुंडे यांनी राजीनामा द्यायचा निर्णय घेतला आहे
मुंबई : बीडमधील मस्साजोगचे सरपंच संतोष देशमुख हत्याप्रकरणात सीआयडी पोलिसांकडून दोषारोपपत्र दाखल झाल्यानंतर पुन्हा एकदा मंत्री धनंजय मुडेंच्या राजीनाम्याची मागणी जोर धरत होती. त्यातच, दोषारोपपत्रातून संतोष देशमुख यांना मारहाण करणारे काळीज हेलावून टाकणारे फोटो समोर आल्यानंतर राज्यभरातून पुन्हा तीव्र संतापाची लाट पसरली आहे. दुसरीकडे अधिवेशनाच्या दुसऱ्या दिवशी विरोधकांनी धनंजय मुंडेंच्या (Dhananjay munde) राजीनाम्यावरुन रान उठवलं असून मंत्री धनंजय मुंडेंनी आपला राजीनामा मुख्यमंत्र्यांकडे दिला आहे. त्यानंतर, ट्विट करत सद्सद विवेक बुद्धीला स्मरुण आणि वैद्यकीय कारणास्तव आपण राजीनामा देत असल्याचे त्यांनी म्हटले. आता, राष्ट्रवादी काँग्रेसकडून (NCP) धनंजय मुंडेंच्या राजीनाम्याबाबत अधिकृत पत्रक जारी करण्यात आलं आहे. त्यामध्ये, धनंजय मुडेंचा हत्याप्रकरणाची संबंध नाही, नैतिकतेच्या मुद्द्यावरुन हा राजीनामा घेतल्याचं पक्षाचे प्रदेशाध्यक्ष सुनील तटकरे यांनी म्हटलं आहे.
मंत्री धनंजय मुंडे यांच्या राजीनाम्याविषयी राष्ट्रवादी काँग्रेस पक्षाची भूमिका स्पष्ट करण्यासाठी हे पत्रक जारी करत आहोत. राष्ट्रवादी काँग्रेस पक्षाची प्रारंभापासूनच अशी स्पष्ट भूमिका राहिली आहे की, संतोष देशमुख हत्याप्रकरणातील दोषींवर कडक कारवाई झालीच पाहिजे. बीडसह संपूर्ण राज्यभरातील आमच्या पक्षाच्या नेत्यांनी याबाबत अत्यंत ठाम भूमिका घेतली आहे. आज धनंजय मुंडे यांनी घेतलेला राजीनाम्याच्या निर्णय हा नैतिकतेला धरून आहे. संतोष देशमुख प्रकरणाचा तपास कोणत्याही दबावाशिवाय सुरू आहे आणि तो असाच चालू राहून आरोपींना कठोरात कठोर शिक्षा व्हावी, ही आमची अपेक्षा आहे. हे प्रकरण न्यायालयीन असून तपास सुरू असल्याने त्यावर अधिक भाष्य करणे उचित ठरणार नाही. परंतु, राष्ट्रवादी काँग्रेस पक्ष एक गोष्ट अत्यंत स्पष्टपणे सांगू इच्छितो की कोणत्याही गुन्ह्याला, गैरकृत्याला पक्षाचे किंवा आमच्या नेत्यांचे कधीही समर्थन असणार नाही. आजच्या घटनेतून हाच संदेश राज्याला गेला आहे, असे राष्ट्रवादी काँग्रेसचे प्रदेशाध्यक्ष सुनील तटकरे यांनी पक्षाची अधिकृत भूमिका जाहीर करत म्हटलं आहे.
श्री. धनंजय मुंडे यांचा या प्रकरणाशी संबंध आहे, असे तपासात समोर आलेले नाही. मात्र, नैतिकतेच्या मुद्यावर एक जबाबदार राजकीय नेता म्हणून धनंजय मुंडे यांनी राजीनामा द्यायचा निर्णय घेतला आहे. राष्ट्रवादी काँग्रेस पक्षाचे राष्ट्रीय अध्यक्ष उपमुख्यमंत्री अजितदादा पवार यांनी पूर्वीच नैतिक मुद्यांवर स्वतः राजीनामा देण्याचे उदाहरण निर्माण केले होते आणि या प्रकरणातही त्यांनी तशीच ठाम भूमिका घेतली होती. या प्रकरणातून राष्ट्रवादी काँग्रेस पक्ष एक महत्त्वाचा संदेश देत आहे, न्याय व्यवस्था आणि कायदा यावर आमचा पूर्ण विश्वास आहे आणि त्यांच्या कामात आम्ही कधीही हस्तक्षेप करणार नाही. न्यायाला विलंब होऊ नये यासाठी आम्ही कटिबद्ध आहोत, असेही तटकरे यांनी राष्ट्रवादी काँग्रेस पक्षाच्या परिपत्रकातून म्हटलं आहे.
राजीनाम्यानंतर धनंजय मुंडेंची भूमिका स्पष्ट
बीड जिल्ह्यातील मस्साजोगचे स्व. संतोष देशमुख यांच्या निर्घृण हत्येतील आरोपींना कठोरात कठोर शिक्षा व्हावी, ही माझी पहिल्या दिवसापासूनची ठाम मागणी आहे. काल समोर आलेले फोटो पाहून तर मन अत्यंत व्यथित झाले. या प्रकरणाचा तपास पूर्ण झाला असून आरोपपत्र न्यायालयात दाखल झाले आहे. तसेच, न्यायालयीन चौकशीही प्रस्तावित आहे. माझ्या सदसद् विवेक बुद्धीला स्मरून आणि मागील काही दिवसांपासून माझी प्रकृती ठीक नसल्याने पुढील काही दिवस उपचार घेण्याचा सल्ला डॉक्टरांनी दिला आहे. त्यामुळे, वैद्यकीय कारणास्तव सुद्धा मी मंत्रिमंडळातून माझ्या मंत्रिपदाचा राजीनामा मुख्यमंत्री महोदयांकडे दिला आहे, असे धनंजय मुंडेंनी म्हटलं आहे.
हेही वाचा
मोठी बातमी : धनंजय मुंडेंना मंत्रिपदच द्यायला नको होतं, राजीनामा आधीच द्यायला हवा होता : पंकजा मुंडे
महत्त्वाच्या बातम्या
