Devendra Fadnavis News : देवेंद्र फडणवीस नाराज? सलग दुसऱ्या दिवशी मुख्यमंत्री एकनाथ शिंदेंसोबत एकत्र येण्याचं टाळलं?
Devendra Fadnavis News : उपमुख्यमंत्री देवेंद्र फडणवीस नाराज आहेत का असा प्रश्न उपस्थित होत आहे. कारण सलग दुसऱ्या दिवशी देवेंद्र फडणवीस यांनी मुख्यमंत्री एकनाथ शिंदे यांच्यासोबत एकत्र टाळलं.
Devendra Fadnavis News : उपमुख्यमंत्री देवेंद्र फडणवीस (Devendra Fadnavis) हे अजूनही मुख्यमंत्री एकनाथ शिंदे (CM Eknath Shinde) आणि शिवसेनेवर नाराज आहेत का असा प्रश्न उपस्थित होत आहे. कारण सलग दुसऱ्या दिवशी देवेंद्र फडणवीस यांनी मुख्यमंत्री एकनाथ शिंदे यांच्यासोबत एकत्र टाळलं. मुंबईत आज महाराष्ट्र राज्य रस्ते विकास महामंडळाचा आज 75 वा वर्धापन दिन साजरा करण्यात येत आहे. निमंत्रण पत्रिकेवर मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचं नाव छापलेलं आहे. परंतु देवेंद्र फडणवीस यांच्या आजच्या कार्यक्रमांमध्ये या वर्धापनदिनाच्या कार्यक्रमाचा उल्लेख नाही.
एसटीचा "अमृतमहोत्सवी" वर्धापन दिन सोहळा आज मुख्यमंत्री एकनाथ शिंदे यांच्या अध्यक्षतेखाली नरिमन पॉईंट इथल्या यशवंतराव चव्हाण प्रतिष्ठान सभागृहात संध्याकाळी चार वाजता होणार आहे. उपमुख्यमंत्री देवेंद्र फडणवीस हे या कार्यक्रमाचे प्रमुख पाहुणे आहेत.
शिवसेनेच्या जाहिरातीवरुन भाजपमध्ये नाराजी
शिवसेनेकडून (शिंदे गट) काल महाराष्ट्रातील जवळपास सर्व वृत्तपत्रांमध्ये जाहिरात देण्यात आली होती. 'देशात मोदी, महाराष्ट्रात शिंदे' अशा आशयाची ही जाहिरात होती. तसेच, या जाहिरातीत मुख्यमंत्रीपदासाठी 26.1 टक्के जनतेची शिंदेना तर 23.2 टक्के जनतेची पसंती फडणवीसांना असल्याचा उल्ले जाहीरातीत करण्यात आला होता. त्यामुळे भाजपमधून नाराजीचा सूर आवळला होता.
सलग दुसऱ्या दिवशी मुख्यमंत्र्यांसोबत एकत्र न येण्याचा अर्थ काय?
या जाहिरातीमुळे देवेंद्र फडणवीस नाराज असल्याची चर्चा रंगू लागली होती. त्यातच देवेंद्र फडणवीस यांनी आपला कोल्हापूर दौरा अचानक रद्द केला होता. कोल्हापुरातील शासन आपल्या दारी कार्यक्रमासाठी मुख्यमंत्री शिंदे आणि उपमुख्यमंत्री फडणवीस एकत्र जाणार होते. मात्र फडणवीस यांनी दौरा रद्द केल्याने ते नाराज असल्याचीच चर्चा जास्त रंगली. कानाचा त्रास होत असल्याने दौरा रद्द केल्याची माहिती नंतर देण्यात आली. मात्र आज दुसऱ्या दिवशी देखील मुख्यमंत्री एकनाथ शिंदे यांच्यासोबत मंचावर एकत्र न येण्याचा अर्थ काय आहे? फडणवीस नाराज आहेत का? असे प्रश्न आता विचारले जात आहेत.
फडणवीसांकडून आज फक्त सह्याद्रीवर बैठका : सूत्र
दरम्यान, उपमुख्यमंत्री देवेंद्र फडणवीस यांचे आज बाहेर देखील दौरे होते, पण डॉक्टरांच्या सल्ल्यानुसार ते मोठ्या सभा आणि विमान प्रवास टाळत आहेत. यामुळेच आज त्यांनी फक्त सह्याद्रीवर बैठका आयोजित केल्या आहेत, अशी माहिती एबीपी माझाच्या सूत्रांनी दिली आहे.
शिवसेनेकडून आज नवीन जाहिरात
कालच्या जाहिरातीवर मोठं वादंग उठल्यानंतर त्यातील चूक दुरुस्त करण्यात आलेली आहे. आज पुन्हा एकदा वर्तमानपत्रामध्ये नव्यानं जाहिराती देण्यात आल्या आहेत. या नव्या जाहिरातीमध्ये मात्र एकनाथ शिंदे यांच्यासह देवेंद्र फडणवीस यांचा फोटो झळकतो आहे. दोघांच्या नेतृत्वाला महाराष्ट्राची साथ दिली आहे, अशी ग्वाही दिली जात आहे. नरेंद्र मोदी यांच्या साथीनं विकासाचे पर्व महाराष्ट्रात आलं आहे, असं सांगितलं जात आहे. महत्त्वाचं म्हणजे, कालच्या जाहिरातीमध्ये देवेंद्र फडणवीस यांना डिवचण्याचा प्रयत्न झाला होता, तो दुरुस्त केला गेला आहे.
हेही वाचा
महत्त्वाच्या बातम्या
