Eknath Shinde: राजन विचारे पैसे द्यायचा नाही ना वडापाव खाऊ घालायचा, पण माझ्या सांगण्यावर कार्यकर्ते काम करायचे: एकनाथ शिंदे
Maharashtra Politics: देवेंद्र फडणवीस यांनी उद्धव ठाकरेंची खूप कामं केली. अमित शाह मला स्वत: बोलले, मी बंद दरवाज्याआड काही बोलत नाही, सगळं समोरासमोर बोलतो. पण उद्धव ठाकरेंना फक्त मुख्यमंत्री व्हायचे होते.
ठाणे: आजपर्यंत ठाणे लोकसभा मतदारसंघात राजन विचारे हा सामान्य कार्यकर्त्यांमुळे निवडून यायचा. यामध्ये राजन विचारेंचं कर्तृत्व काय होतं? खासदारकीला मोदी साहेबांच्या नावावर तुम्हाला मतं मिळाली, असे वक्तव्य मुख्यमंत्री एकनाथ शिंदे यांनी केले. ते सोमवारी ठाण्यातील महायुतीचे उमेदवार नरेश म्हस्के यांच्या प्रचारसभेत बोलत होते. यावेळी एकनाथ शिंदे यांनी ठाकरे गटाचे उमेदवार आणि विद्यमान खासदार राजन विचारे यांच्यावर टीकास्त्र डागले.
निवडणुकीच्या काळात राजन विचारे कार्यकर्त्यांना पैसे द्यायचा नाही ना वडापाव खाऊ घालायचा. तरीही मी सांगायचो म्हणून सगळे काम करायचे. आता राजनचा सीझन संपला, नरेशचा विजय आता पक्का आहे. पण संजय केळकरांची विनंती आहे की, नरेश तुला थोडं बदलावं लागेल, असे शिंदे यांनी म्हटले. ज्यांना तिकीट मिळालं नाही त्यांनी चिंता करु नका. मला काही जणांना तिकडे पाठवायचे आहे, काहीजणांना इकडे ठेवायचे आहे, असेही शिंदे यांनी सांगितले.
एकनाथ शिंदेंचा नगरसेवकांना इशारा
या सभेत एकनाथ शिंदे यांनी आपल्या नगरसेवकांना आणि कार्यकर्त्यांना एक महत्त्वाचा इशारा आणि काही सूचना दिल्या. 20 तारखेपर्यंत कोणीही सुट्टी घेऊ नका. मोदीजींनी एकही सुट्टी घेतली नाही. एकनाथ शिंदेही एक दिवसही सुट्टी घेत नाही. घराघरात जा आणि लोकांना मतदान करायला सांगा. सकाळी सकाळी जाऊन लोकांना भेटा. सुट्टीत गावी जाणाऱ्या लोकांना मतदान करायला सांगा. मतदार बाहेर गेले असतील तर त्यांना इकडे आणण्याची प्रक्रिया आपण करु. नगरसेवकांची ही ट्रायल निवडणूक आहे. काम केलं तर तिकीट नाहीतर मग?, असे एकनाथ शिंदे यांनी म्हटले.
उद्धव ठाकरे मला आनंद दिघेंवर सिनेमा काढून देत नव्हते: एकनाथ शिंदे
आनंद दिघे यांचे निधन झाल्यानंतर मी उद्धव ठाकरे यांना भेटायला गेलो तेव्हा त्यांचा पहिला प्रश्न होता की, दिघे यांची प्रॉपर्टी कुठे कुठे आहे? ते ऐकून मला वाटलं की, आपण चुकीच्या जागी आलो. उद्धव ठाकरे मला दिघे साहेबांचा सिनेमाही काढून देत नव्हते. बाळासाहेब ठाकरे यांचा सिनेमा निघाल्यानंतर दिघे साहेबांचा सिनेमा काढला म्हणून वेळ लागला. त्यातही अर्धा सिनेमा पाहून उद्धव ठाकरे निघून गेले. आता पार्ट २ येतोय, आता कळेल जे काय खरं खरं आहे ते या सिनेमामध्ये दिसेल, असे एकनाथ शिंदे यांनी सांगितले.
आणखी वाचा
नरेश म्हस्के यांच्याविरोधात भाजप कार्यकर्त्यांचे राजीनामे, ठाण्याच्या जागावाटपावरून भाजप कार्यकर्त्याचे नाराजीनाट्य
महत्त्वाच्या बातम्या
